GIHAMPAK og dakong kakulian ang tinguha sa bantugang weightlifter sa Pilipinas nga si Hidilyn Diaz nga makarepresentar sa nasod alang sa Tokyo Olympics.
Kini human ang Columbia, nga mo-host unta og qualifying event karong semanaha, miisyu og travel ban sa tanang mga langyaw nga magagikan sa Europe o Asia sa magsunod 14 ka mga adlaw nunot ning padayong hulga sa coronavirus disease (Covid-19).
Si Diaz, kinsa usa ka silver medalist sa 2016 Rio Olympics, nagkinahanglang mosalmot sa kompetisyon sa Cali, Colombia sa tinguha nga maka-qualify sa Tokyo Olympics.
Dako unta og poruhan si Diaz gumikan kay nagkinahanglan lang niyang makasulod sa top 10 sa Colombia event aron ma-qualify sa matag upat ka mga tuig nga kompetisyon.
Tungod niini, natanggong si Diaz sa Malaysia diin kasamtangang siyang hugot nga nagbansaybansay kauban ang iyang team.
Basi sa International Weightlifting Federation (IWF) website, ang Colombia event giuswag sa laing petsa.
Matod ni Samahang Weightlifting ng Pilipinas president Monico Puentevella nga mohangyo siya nga i-review ang qualifying process sa IWF gumikan sa pagkuyanap sa Covid-19.
“I’m optimistic that the IWF Board will reconsider our plea and resolve this problem at hand in fairness to all associations worldwide,” asoy ni Puentevella sa interbyu sa Rappler.com. Si Diaz kasamtangang ikalima sa kalibutan sunod sa upat ka lifters gikan sa China. (ESL)