UNSA kaha kon mokalit sa pagdaghan ang coronavirus disease 2019? Dakong pangutana kini nga naa sa akong hunahuna karon.
Tinuod makatabang kining lockdown nga gitawag og community quarantine. Lockdown, matod pa ni Presidente Rodrigo Duterte. Apan community quarantine kon ang iyang mga opisyal ang pasultihon. Busa pareho ra kana.
Kon atong balikon ang mga pamahayag sa presidente, wala mahisgutan ang pangutana kabahin sa pagkaon ug uban pa gawas sa papel sa kapulisan ug mga sundawo sa pagpakaog sa community quarantine.
Bisan pa man, atong masabot nga kining maong quarantine mao ang pagpahinay sa pagkatap sa maong kagaw. Di na lang kita maghisgot sa pasalamat sa presidente sa China. Wa sab siyay hisgot sa saad sa Russian Federation pinaagi sa Russian Ambassador nga mohatag og Cicloferon, usa ka anti-viral medicine sa ilaha nga nakitang epektibo batok sa Covid 19.
Pananglitan, way klase ang tanang mga tunghaan kay bisan usa lang pananglit ang positibo nga motambong og klase sa buntag, pila kaha ang mopauli nga nataptan sa hapon?
Naa lay dakong buslot ang maong stratehiya sa kagamhanan, sa akong tan-aw. Kulang kaayo kita sa mga testing kits. Ang atong mga botica kulang kaayo kita sa alcohol.
Dayon, daghang dapit nga walay klarong agas ang gripo sa Metro Cebu Water District (MCWD). Di lang unta motago ang bag-ong MCWD chairman nga si Atty. Joey Daluz ug moisyu siyag pamahayag kanus-a walay undang ang agas sa tubig.
Lisod na kon si Mayor Edgar Labella ug ang Cebu City health office magsigig ingon nga manghugas sa kamot gamit ang tubig ug sabon. Apan perming way agas.
Tungod niini, nakapangutana ko kon sakto ba ang atong mga supplies ug mga facilities kon simbako modaghan sa pagkalit ang mga positibong mataptan.
Sa tibuok nasud pananglit, pila kabuok ang atong mga ICU beds? Duna ba kitay igong mga frontline health personnel.
Nabalaka ko sa nahitabo sa Syudad sa Dumaguete diin ubay-ubay sa ilang mga health front liners ang gipang-quarantine kay dili andam adtong usa ka konsehal sa lungsod sa Tayasan nga positibo sa Covid 19.
Maayo gani kay wala pa siya matakdi sa Covid 19 kadtong nanambong pa sila sa Philippine Councilors League (PCL) duha ka semana nga milabay. Mokatag na unta sa tibuok nasud kon maoy nahitabo.
Didto lang sa Tayasan, nitambong pa kining konsehal og usa ka graduation sa wala pa kini mahospital.
Sa pagkakaron, duna nay community quarantine ang Syudad ug Lalawigan sa Sugbo. Tarungon lang unta ni Mayor Edgar Labella ang iyang quarantine center nga nagtupad ang mga katre, murag teheras sa barko.
Ato kining gipadayag dinhi aron maremedyohan dayon ang pipila ka kulang sa atong preparasyon. (@anol_cebu sa Twitter)