ENTERO. Karon, ang tibuok lalawigan sa Sugbo nagkwarentinas na sugod kagahapon aron mapugngan ang pagkatap sa gikahadlokan nga coronavirus (COVID-19) nga 98 na ka tawo ang nataptan dinhi sa atong nasud. Gani duna nay namatay didto sa mga dato nga nasud sama Amerika ug Italya.
Ang nag-una mao ang dakbayan sa Sugbo ug misunod ang mga silingan nga dakbayan sa Mandaue ug Lapu-Lapu. Misunod usab ang 44 ka lungsod sa Cebu sa pagsubay sa inusara nga lagda agi og pagsubay sa State of Public Health emergency nga gideklarar ni Presidente Durterte sa miaging semana.
Ang dakbayan sa Sugbo gawas sa pagmando og kwarentinas mideklarar usab og curfew alang sa mga batan-on gikan sa 10 sa gabii hangtud sa alas singko sa buntag. Sa tinuoray di lang gikwarentinas ang dakbayan sa Sugbo apan gisira gyud sa uban dapit aron malikayan ang pagkuyanap sa Covid19.
Atong mahinumduman nga niadtong buwan sa Enero sa pagsiak sa balita nga nadiskobrehan and coronavirus didto sa dakbayan sa Wuhan, China, si Lapu-Lapu City Mayor Ahong Chan ingon man si Cebu City Mayor Edgar Labella mirekomendar og travel ban o sa dili pagpasulod sa Sugbo sa mga biyahidor gikan sa China o nakahapit sa Hong Kong.
Apan gikataw-an ug gisaway silang duha. Karon, napamatud-an nga husto ang ilang gibuhat.
Di ba morag uwahi na karon ang aksyon sa nasudnon ug mga lokal nga kagamhanan sa pagpatuman sa giingon nga community quarantine tungod kay mikuyanap na man og maayo ang Covid19? Di ni pagbasol, apan maayo na lang bisan og nalangay tungod sa mga hinungdan nga di kalikayan kay wa sa gyuy lakang nga gibuhat ang atong kagamhanan.
Ang una nga naapektohan sa kwarentinas mao ang mga eskuylahan kay gisuspenso bali og usa ka semana ug ang mga dunay bihaye sa lain nga dapit. Gani, tungod sa kwarentinas daghan ang nakurat mao nga kusog ang halin sa mga palaliton sama sa alcohol ug tissue ingon man sa mga pagkaon delata ug uban pa.
Sama sa Sugbo, ang kagamhanan sa probinsya sa Bohol mimando usab nga walay makasulod o gawas sa probinsya sulod sa panahon sa kwarentinas gawas sa mga kargamento sama sa pagkaon ug lagotmon.
Tungod sa pagdagsa sa katalagman dinhi sa atong nasud aning Covid19, nga makamatay sa tawo nga duna nay gibati nga sakit, ug sa ASF (African swine fever), sakit sa baboy, nga dakong epekto sa atong ekonomiya ug panglawas, dunay mga panghunahuna kon usa ba kini ka pagsakit sa katawhan nga nahikalimot na sa ilang pagtuo sa Diyos, nga manunubos.