UNSA ka tinuod ang balita nga nagsugod na og nihit ang supply sa baboy sa probinsiya sa Cebu?
Matod pa, mireklamo na og sugod ang mga tig-distribute sa karneng baboy tungod sa kanihit sa supply. Makapalit man tuod sila apan mahal na ang baligya sa buhi nga baboy, nga matod pa, mikabat na sa tag-120 ngadto sa 130 kada kilo sa buhi nga baboy.
Kon magpadayon kini, hayan mokabat na sa sobra sa tag-300 ang kilo sa karneng baboy sa merkado.
Dili ako matingala niini sanglit mipadayag na man daan ang kahugpungan sa mga tig-buhi og baboy sa Cebu nga duna silay supply sulod sa 3 ka bulan.
Gisulti niya kini mga pipila na ka semana ang milabay. Buot ipasabot, medyo gamay-gamay na lang ang nahibilin karon sa ilang kwentada nga supply.
Kon dili gihapon makasulod ang mga baboy sa ubang probinsiya bisan kon wala pa sila gihasi sa African Swine Fever (ASF) ug bisan kon duna silay husto nga mga papeles, moabot gyod ang panahon nga mahurot na ang supply sa baboy sa Cebu.
Nagnihit ang alcohol, hasta ang tissue paper.
Nagnihit sab ang thermal scanner nga maoy mokuha sa temperatura sa mga tawo nga mosulod sa mga building.
Sa dihang nangutana ako sa usa ka city health officer, misulti siya nga dugay na sila nag-proseso sa mga papeles alang niini apan nalangan gyod kini sanglit moagi pa man og bidding unya daghan pa og again nga mga proseso nga maoy hinungdan sa kalangan.
Dili ka pwede mo short cut, matod pa niya, kay segurado nga gukdon gyod ka sa taga-COA, bisan pa og minatarong ang imong katuyoan.
Mao ni naka-lisod.
Dili andam ang atong kagamhanan sa COVID. Kulang ang atong mga isolation rooms, kulang ang mga personal protection equipment (PPE), hasta ang mekanismo alang sa mga LGU sa pag-asdang sa COVID, kulang sab.
Gani, miawhag na ang ubang mga LGU nga kon matakdan man gani, deretso na lang dayon sa “isolation room” sa ilang tagsa-tagsa ka mga panimalay og dili na lang moadto sa ospital.
Heal yourself, matod pa, kay dili makaapas ang pagpangandam nga gihimo sa atong kagamhanan.
Mao kini hinungdan nga gihugtan ang pag-awhag sa mga katawhan nga magpuyo lang sa balay og dili mogawas, gawas kon importante gyod kaayo ang tuyo sa gawas.
Gituyo kini aron malikayan ang pagtakod sa maong sakit og masumpo kini sa labing madaling panahon.
Husto kaayo kini. Dili nato dugangan ang problema sa nasod pinaagi sa kagahi sa atong ulo. Angayan lang nga sundon nato kini, hiposon ang mga sakop sa pamilya og dili tugtan nga maglaroy-laroy lang sa gawas.
Nindot sab nga kadtong himsog ang panglawas, dili lang mogamit sa face masks og gwantes. Ireserba nato kining mga face masks og gwantes sa mga kaigsoonan nato nga anaa magtrabaho sa mga ospital ug mga clinic. Sila ang angayan mogamit niini sanglit sila ang nag-una sa pag-asdang sa maong sakit.
Kon magpundo lang kita sa atong panimalay og magsunod sa mga gilatid nga kalimpiyo sa atong palibot, wala na kita magkinahanglan sa face masks ug gwantes.
Imbis magpundo kita og daghan nga face masks, alcohol ug tissue sa atong panimalay, gamiton lang nato ang atong kwarta sa pagpalit sa atong inadlaw nga mga pagkaon, labi na gyod ang bugas.
Dili kinahanglan nga mangompra kita og daghan tungod sa kahadlok nga mahutdan og stock. Atong hinumdoman nga ting-ani karong mga bulana og makapaabot kita nga paigo ra ang atong supply sa bugas dinhi sa atong rehiyon.
Kon duna man gani gamay nga pagsaka sa presyo, tungod kini sa kalisod sa transportasyon og dili tungod sa kakulang sa supply.
Kataw-anan ra pod ning ubang mga tawo.
Hilabihan nilang batikos nga mga military ug mga polis ang nag-implementar sa community quarantine protocol.
Angay kuno nga mga medical personnel og dili mga military, ang magpasunod sa maong protocol tungod kay health issue man kuno kini.
Susmariosep.
Wala na gyod laing makita ning mga tawhana?
Kon mga medical personnel ang mobantay sa mga check-point, kinsa na man lang diay ang mahibilin sa mga ospital?
Motrabaho pa sila sa ospital, mobantay pa gyod sila sa mga checkpoint?
O kaha, gusto ba nila bahinon ang mga trabahante sa ospital, ang uban mobantay sa checkpoint ug ang uban padayon sa ilang trabaho sa ospital? Husto ba kini?