DAKO kaayo ang kahasol nga atong gisagubang niining coronavirus disease (Covid-19) nga gikan sa Wuhan City, China, nga mikalas na og libuan ka mga kinabuhi sa tibuok kalibutan.
Kini human gipatuman ang partial lockdown dakbayan sa Davao ug Tagum niadtong Dominggo sa gabii, Marso 15.
Kung grabe ang kahasol sa mga Dabawenyo, mas labaw na ang kahasol nga nasinati sa mga taga National Capital Region.
Apektado kitang tanan ilabi na ang ekonomiya, apan angay nato kining tumanon alang sa atong kaluwasan.
Unang gisuspenso ang klase sa elementarya hangtud na sa post-graduate studies aron di mograbe ang suliran.
Sunod gisuspenso ang mga domestic flights sa nasud aron maminusan ang risgo sa pagtakboy sa makamatay nga balatian.
Mas maayo gyud unta kung gikansela na kaniadto pa ang international flights, di ba?
Mosamot pa kini kung mahitabo nga ibutang ilawom sa lockdown ang tibuok isla sa Luzon, nga pinuy-anan sa 57 milyones ka mga tawo, kay mapasmo kita.
Sa nahitabo karon, angay nga magtinabangay kita pinaagi sa pagtuman sa mando sa gobyerno, pagpatuman sa maayong paagi nga mapugngan ang bayrus.
Mao kini ang among gihimo sa unibersidad ug sibyahanan sa radyo nga akong gialagaran.
Sa tunghaan, gipatuman ang pagsuspenso sa klase ug mga kalihukan sud ug gawas sa unibersidad samtang sa Aksyon Radyo, sa balay na nagtrabaho ang mga empleyado, gidili ang pagdawat og bisita, ug ipaagi na lang sa telepono ang mga interbyu, ug daghan pa.
Sa nagkagrabe nga sitwasiyon, kinahanglan nga molihok na ang mga opisyales sa barangay, lungsod, siyudad, probinsiya, nasyonal nga ahensiya sa gobyerno, nagkadaiyang sektor, ilabi na ang mga negusyante.
Ang kakulang sa atong kooperasyon maoy nakapasuko ni Pangulong Rodrigo Duterte mao nga gitawag niya ang coronavirus nga vee-rus.
Suma niya, iyang gituyo ang paglitok sa virus ngadto sa vee-rus tungod kay naglagot siya sa kaaway nga di makita.
Bitaw, mao sab ni ang akong gibati sa panahon nga di nako makita ang akong kadula sa tagu-tagoanay kun vee-rus-sanay.
Busa, tabangan nato ang gobyerno aron pildihon ang kontra nga di makita.