NAGSUGOD na sa pagpatuman ang Mactan Cebu International Airport MCIA sa upat ka adlaw nga trabaho alang sa ilang mga kawani.
Kini subay sa usab sa kamandoan ni Presidente Rodrigo Duterte nunot sa padayong pagkatap sa coronavirus disease (Covid-19) sa nasod.
Matod ni Mary Ann Dimabayao, public affairs manager sa MCIA, nga niadtong Lunes Marso 16 nagsugod sila sa pagpatuman sa upat ka adlaw nga trabaho sa usa ka semana alang sa mga trabahante.
Sumala pa nga adunay mga empleyado nga mag day-off og Sabado hangtod Lunes o Biyernes hangtod Dominggo depende na kini sa desisyon sa ilang empleyado, apan gikinahanglan nga motamod sa 10 ka oras nga trabahao matag adlaw sa usa ka semana.
Giklaro ni Dimabayao nga walay labot ang ubang mga empleyado sa tugpahanan sama sa mga field workers ug security personnel nga kanunay naka deploy sa tugpahanan sa gipatuman nga upat ka adlaw nga trabaho sa usa ka semana.
Kini bisan paman kon wala nay mogikan ug mosulod nga flights sa tugpahanan subay sa pagdili na pagpasulod ug mga biyahe gikan sa nagkadaiyang dapit sa nasud.
Sa pagkakaron normal operation ra gihapon ang tugpahanan bisan wala na kaayo mga pasahero ang MCIA.
Walay kawani sa MCIA nga gitaktak taliwala sa kamingaw sa tugpahanan.
“Nag-start nami pero ang uban nga wala kabalo gani karon na lang gi-offset ang ilang dayoff, ang security ug operations as is na sila kay di man sad puwede,” pagpasabot ni Dimabayao.
Samtang si Avigael Maningo-Ratcliffe, junior manager sa corporate communications sa GMR Megawide Cebu Airport Corporation (GMCAC) sa iyang bahin mibutyag nga wala pa sila mopatuman sa 4-day work week sa ilang mga trabahante ug nagpabiling normal ang ilang operasyon.
Kini bisan paman kon walay gitugotang eroplano nga makagikan ug makasulod sa tugphanan gikan ug paingon sa ubang nasod.
Normal ra gihapon ang trabaho sa ilang mga empleyado sa Terminal 1 (Domestic).
Aduna pay pipila ka mga pasahero nga nagpabilin sa tugpahanan human maabti sa kamandoan nasudnong kagamhanan ug ni Governor Gwendolyn Garcia nga wala nay pabiyahi-on paingon sa ubang mga tugphanan sa nasod.
Apan gikatakda silang kuhaon sa Department of Tourism ug Lapu-Lapu City Government aron pangita-an ug asa sila ipahimutang sulod sa 30 ka adlaw nga pagdili sa mga biyahe sa tugpahanan.
Ang Terminal 2 (International) nagpabilin usab nga normal ang ilang operasyon sanglit padayon pa man ang biyahe sa mga eroplano sa mga nasod nga wala malakip sa travel ban sumala pa ni Maningo.
“Ang Terminal 1 base sa announcement sa Cebu Pacific, Air Asia ug Philippine Airlines nga cancel na ang tanang flights starting March 17 wala na gyud pero both terminals naa gihapon mi naka deploy nga operations team namo,” matod ni Maningo. (GCM)