Paghatag sa hinabang gi-uswag sa DSWD 7

ADUNAY kapin sa milyon ka mga benepisyaryo sa Central Visayas ang apektado sa pagsuspenso sa programa ug serbisyo sa Department of Social Welfare and Development (DSWD).

Apan matod sa tigpamaba sa DSWD7 Leah Quintana, tungod kay aduna nay cash cards ang mayoriya sa benepisyaryo sa Pantawid Pamilyang Pilipino Program (4Ps) dili kini ma-apektohan sa suspension.

Usa ning panagtapok nga rason nganong gi-suspenso sa DSWD ang cash out sa tanan nilang programa ug serbisyo isip likay sa pagkatap sa coronavirus disease 2019 (Covid-19).

Si DSWD Secretary Rolando Joselito Bautista miluwat og Department Advisory No. 1 niadtong Marso 14 mahitungod sa “Guidelines for the Prevention, Control, and Mitigation of the Spread of the Coronavirus Disease (Covid-19).”

Lakip sa gisuspenso ang payouts sugod niadtong Marso 15 ngadto na sa Abril 14, ang Social Pension sa Indigent nga Senior Citizens ug Unconditional Cash Transfer (UCT).

Gihunong usab ang kalihokan sa Pantawid Pamilyang Pilipino Program (4Ps) diin naglakip ang Social Welfare and Development Indicator (SWDI), over-the-counter pay-outs ug distribution sa cash cards.

Ang social pension gihimo kaduha matag tuig, samtang ang 4Ps matag duha ka buwan nga gipang-apod apod ug ka usa sa usa ka tuig ang UCT madawat.

Gipasabot ni Quintana nga tungod sa kadaghan sa mga hataganan sa payouts dili kini mahatagan dayon.

Sa Central Visayas lang anaa sa 276,318 ang na-enroll sa 4Ps diin 263,458 ang aduna na’y cash card.

Sa Social Pension adunay 279,037 ka beneficiaries samtang ang UCT moabot sa 495,435 ka beneficiaries.

Lakip sa gihunong sulod sa usa ka buwan ang kalihokan sa Climate Change Adaptation and Mitigation, Offsite Serbisyo, Emergency Shelter Assistance (ESA), Supplementary Feeding Program (SFP), Sustainable Livelihood Program (SLP), ug Kapit-Bisig Laban sa Kahirapan-Comprehensive and Integrated Delivery of Social Services (Kalahi-CIDSS) ug ubang service delivery assessments. (HBL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph