MAAYONG balita para sa gatusan ka mga vendor sa Dakbayan sa Sugbo.
Gianunsyo ni Cebu City Mayor Edgardo Labella nga makabalik na pagpaninda daplin sa karsada ang mga manindahay nga kaniadto gipapahawa gumikan sa road clearing sa nakalabay nga tuig sa dalan Colon, Osmeña boulevard ug uban pa.
Ang road clearing operation gimando sa Department of the Interior and Local Government (DILG). Sa tibuok nasod kini gipatuman.
Gipadayag ni Labella nga temporaryo ra ang ilang pagbalik ug dunay mga kondisyon. Kinahanglan ilang i-maintain ang kalimpyuhon sa sidewalk ug kinahanglan nga di makababag sa mga tawo nga moagi sugod alas 9 sa buntag hangtod alas 7 sa gabii.
Gumikan sa Covid-19, gimanduan usab ang mga vendor nga magtaod og face mask ug adunay libreng alcohol isip disinfectant nga mahimong magamit sa mga kustomer.
Sa pagbalik sa mga vendor, ila na usab ibutang ang design sa stall nga maoy ilang butangan sa ilang tinda aron di gubot sa panan-aw ug daw dekorasyon sa sidewalk sanglit adunay tanom nga gidesinsyo niini.
P8 milyones gikan sa DOLE
Gidawat kagahapon ni Labella ang P8 milyunes nga gitunol ni Assistant Regional Director Lilia Estellore sa Department of Labor and Employment (DOLE) sa buhatan ni Secretary Michael Dino.
Si Labella nagkanayon nga ang kantidad alang sa 400 ka sidewalk vendors nga apektado sa road clearing, kinsa nakakumpleto sa ilang mga dokumento para sa ayuda.
Si Dino niingon nga nauna ang Cebu City sanglit aktibo nga naka-proseso sa mga dokumento si Labella. (PAC)