SUGOD sa Martes sa gabii, Marso 17, 2020, estrikto nang gipatuman ang curfew bisan sa merkado publiko sa Carbon sa Barangay Ermita, Dakbayan sa Sugbo.
Di na pwedeng makapangompra ug makapamaligya gikan sa alas 8 sa gabii hangtod sa alas 5 sa buntag sa pagkasunod adlaw, mga oras sa curfew.
Matud ni Ermita Barangay Captain Mark Rizaldy Miral nga human nga nagpahigayon sila sa information drive sa tibuok Carbon public market niadtong Lunes sa gabii, kuyog ang kapulisan nga gipangulohan ni Police Capt. Alvin Llamedo ug mga kaubang konsehal sa barangay, estrikto na nilang ipatuman ang curfew.
Nagtigom sila aron hisgutan ang pagpatuman.
Matod ni Miral nga kinahanglan nga tumanon ang direktiba nga nalatid sa executive order ni Cebu City Mayor Edgardo Labella nunot sa hulga sa Coronavirus Disease (COVID19).
“Duna toy mga pangutana ilabi sa mga namaligya ug mga klase klase nga karne, pero tungod lagi sa kinahanglan man nga motuman gyud ta, ato silang giingnan nga mas maayo, mas sayo nga oras sa di pa ang curfew,” pagpasabot ni Miral.
Sa naandan, kaadlawon ang oras sa tigkompra sa Carbon pubic market, apan niining mga mosunod nga mga adlaw, dunay kausaban.
Giawhag ni Miral ang mga magpapatigayon sa Carbon public market nga maabisohan sa mga vendor ang ilang mga suki nga mas maayo sayo pa sa alas 8 sa gabii mamgompra aron di sila mahasol pag-abot sa oras sa curfew.
“Kon mahimo, alas 4 anang hapon, mangompra na daan sila. Sayo-sayo paman gyud na, di ba? Kay sugod pagkapagtung tung sa gabii, wa nay tugotan nga magtinda,”dugang ni Miral.
Tanang mga manindahay sirado sa alas 8 sa gabii hangtud na alas 5 sa kaadlawon.
“Ang maong implimentasyon sa curfew dil lang kini kutob sa merkado ha. Atong iklaro nga apil na ni sa kabalayan sa atong area of responsibility.
Ang di motuman, pasakaan og kaso.
Samtang si Jonil Matuguina, market administrator sa Dakbayan, sa pakighinabi sa Superbalita Cebu, niingon nga gihan-ay nila nga ma sychronized ang dagan sa Carbon public market.
“Dunay mihangyo nga unta mag-abli lang sila labi nga kasagaran sa ilang mga kustomer anaa sa kadlawon. Apan ato silang giawhag nga kon mahimo nga motuman lang kay aron makalikay sa sakit,” matod ni Matuguina.