GIDID-AN man tuod sa Philippine Basketball Association (PBA) ang tanan nilang teams nga makapahigayon og praktis nunot ning hulga sa coronavirus disease (Covid-19) apan nakakita lang gihapon og paagi ang mga magduduwa aron magpabiling kondisyon ang ilang lawas.
Usa sa mga pamaagi sa mga magduduwa sa PBA mao ang #HomeWorkoutChallenge nga ilang ipang-post sa nagkadaiyang social media.
Gani, kining maong challenge kanunay gisunod ni Alaska Aces coach Jeff Cariaso ug iya kining ipang-share.
Si Talk N’ Text KaTropa shooting guard Roger Pogoy nag-post sa Instagram og video diin nagbansaybansay siya sa pag-itsa sa gawas nga maoy iyang kinaham.
Nag-post sab si San Miguel Beermen guard Chris Ross og video diin naggamit siya og jump rope sulod sa ilang panimalay.
Wala pa masayri kon kanus-a mahibalik ang aksyon sa PBA Philippine Cup hangtod ning puntoha. (ESL)