Balay-Balay, Tubig-Tubig: Katungod sa amahan ang pagpadako sa bata

KABATAAN: Ginaingon nga paglaum sa umaabot ang kabataan busa, importente ang pagpadako kanila sa katarong. (SunStar File Photo)
KABATAAN: Ginaingon nga paglaum sa umaabot ang kabataan busa, importente ang pagpadako kanila sa katarong. (SunStar File Photo)

DEAR Atty. Joan,

Maayong adlaw, Atty. Joan. Ako diay si Peter, usa ka Overseas Filipino Worker (OFW). Dugay na ko nga gasunod sa inyong lindog sa Superbalita kay makita man kini sa website sa maong pamantalaan.

Taod-taod na ko nga gatrabaho gawas sa nasod isip trabahante sa usa ka barko. Nag-email ako kanimo aron mangayo og kasulbaran sa akong suliran kabahin sa akong asawa ug bata.

Wala nami nagkasinabtanay sa akong asawa. Matawag nga separated kami sa pagkakaron tungod kay wala na kami’y klaro nga komunikasyon sulod na sa pipila ka tuig.

Wala’y labot ang akong panikaysikay sa gawas sa nasod sa among pagbuwag. Gikinahanglan nako nga mularga sa laing nasod aron matubag ang mga panginahanglan sa among pamilya.

Dakong hinungdan sa among problema isip magti-ayon mao ang akong ugangan. Siya maoy nag-agni sa akong asawa nga mulayo kanako. Wala sab ko kasabot ngano wa maka-uyon ang akong ugangan kanako.

Nahigot man gyod ang akong asawa sa iyang mga ginikanan. Plano nako kaniadto nga muhawa na sa panimalay sa iyang mga ginikanan, apan gibabagan kini nila. Dili ko makabuhat sa akong mga plano alang sa akong pamilya tungod kay mag-agad kanunay sa iyang gininkanan.

Ang nakapait sa maong sitwasyon mao nga gibabagan ako nila nga pakigkita sa akong bata. Dili gusto sa iyang mga ginikanan nga makita nako ang ilang apo. Muuli na unta ko sa Pilipinas karong tuiga ug gitinguha nako nga makig-bonding sa akong bata samtang ania ko diri. Akong gihisgutan ang akong asawa niini, apan iya kong giingnan nga dili musugot ang iyang mga ginikanan.

Gani mibahad ang iyang mga ginikanan nga dad-on sa laing lugar ang akong bata aron dili na nako siya makit-an sa hingpit.

Ang akong gihangyo lang gyod nga makit-an unta nako ang akong anak kay wala gyod nako mabatyagan ang akong pagka-amahan. Gimingaw na gyod sa akong bata ug dili masukod ang kasakit nga agong nabatyagan tungod sa mga hitabo.

Gusto na sab nako nga ma-annul ang among kaminyoon sa akong asawa tungod kay dili na man gyod siya makigbalik kanako. Nahibalo ko nga pugos lang kami nga giminyo sa iyang mga ginikanan agig paglikay nga mauwawan sila. Namabdos man ang akong asawa katong uyab pa mi.

Unsa kaha’y maayong buhaton, Atty. Joan? Dugay na gyod ko nga naproblema bahin niini ug gilaum nako nga duna’y kasulbaran niini.

Daghang Salamat!

Imong magtatampo,

Peter

Dear Peter,

Una sa tanan maayong adlaw usab kanimo diha Peter ug salamat sa imong pagsunod niining lindog.

Kabahin sa pagbabag sa imong asawa ug iyang pamilya nga makita ang imong bata, giila sa Family Code ang amahan ug inahan nga duna’y joint parental authority sa ilang anak. Pasabot niini nga dili lang ang inahan ang duna’y katungod nga mu-amoma sa bata, usa sab kini nga responsibilidad nga gimando sa balaod ngadto sa amahan. Subay sa maong mando, angay lang nga dili mababagan ang amahan nga makighimamat ug mangilabot sa pagpadako sa iyang anak.

Wala hinoon nimo nahisgot kanako kon pila ang edad sa imong bata. Kon ang imong anak nagpangedaron ubos sa siyete (7) anyos, lahi ang gimando sa balaod sa maong sitwasyon. Ang bata sa maong pangedaron dili mahimong ibuwag sa iyang inahan. Apan kon mapamatud-an nimo ngadto sa korte nga duna’y igong rason nga bawi-on ang kustodiya gikan sa inahan sama na lang sa pagka-unfit sa inahan sa pagpadako sa iyang bata, mahimo nga ihatag ang kustodiya ngadto sa amahan.

Nahisgotan sab nimo sa imong sulat nga plano nimo nga ipa-annul ang inyong kaminyoon. Sukwahi sa pagtuo sa kadaghanan, dili dali ang proseso sa annulment. Gikinahanglan nga mapatud-an ngadto sa korte ang hinungdan kon ngano putlon ang kaminyoon ug ang mga rason nga gitugot sa balaod kay limitado lang.

Lakip sa mga rason aron ma-annul ang kaminyoon mao ang wala’y parental consent alang sa mga nagminyo nga nagpangedaron og dise otso (18) anyos ngadto sa baynte uno (21) anyos, problema sa pangisip, pagka-ilad o pagpugos sa usa ka contracting party hinungdan nga mitugot sa pagminyo, physical incapability, o duna’y sexually transmissible disease ang bana o asawa.

Kon mapamatud-an nimo nga napugos lang gyod ka sa pagminyo sa imong asawa, duna’y igong basehan ang korte nga mumando nga ipa-annul ang inyong kaminyoon. Kinahanglan hinoon nimo nga ma-file ang kaso ngadto sa korte sulod sa lima ka tuig human sa nahitabong pagpamugos kanimo.

Angay pod nimo nga mahinumduman nga ang free cohabitation o ang boluntayro nga pagpuyo kauban ang imong asawa sulod sa usa ka panimay mahimong depensa nga mababagan ang pagtugot sa annulment.

Daghang salamat Peter sa imong sulat tampo ug hinaot nakahupay ang maong tambag sa naghoot mo karon nga galamhan.

Imong alagad,

Atty. Joan

[Mahimo kamo nga mupadangat sa inyong mga suliran pinaagi sa pag-email (clbphilscebu@gmail.com) o pag-send og mensahe sa among Facebook page nga “Children’s Legal Bureau” (www.facebook.com/ChildrensLegalBureauInc)]

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph