MOABOT ngadto sa 12 ka mga kaso sa aksidente sa dalan ang natala sulod sa usa ka adlaw sa Northern Mindanao Medical Center (NMMC) ning siyudad sa Cagayan de Oro. Kini nga mga kaso pulos adunay kalambigitan sa motorsiklo.

Niadtong adlawng Domingo, 12 ka mga tawo ang pulos nadala sa balay tambalanan human nabanggaan, nadisgrasya ingon man managlahi ang rason sa aksidente.

Unang biktima ang maghigalang Charlotte Marie Asilan, 15 ug Cheryl Toto, 17, pulos backrider sa motorsiklo nga gimaneho ni Joven Capitan, mga residente salungsod sa Talakag, Bukidnon.

Nabangga ang motorsiklo sa maong dapit dihang naligsan ni Capitan ang dako nga bato hinungdan sa pagkaligid ug pagkahulog sa mga sakay niini.

Samtang usa ka Christine Laguit, 22, taga Kolambog, Lapasan ning siyudad ang nakuyapan human nahulog sa motorsiklo niadtong Domingo mga alas 2:00 sa hapon sa Lapasan High Way ning siyudad.

Backrider lamang si Laguit dihang na sideswiped ang gisakyang motorsiklo sa usa ka dyip.

Laing biktima mao sila si Richmund Rafal, 15, taga Zone-6, Bayabas ning siyudad nabangga ang motorsiklo nga gimaneho niini dihang laing sakyanan ang mibangga kaniya sa susamang dapit; Reynaldo Gulben, 40, taga Balulang ning siyudad, nagisi ang nawong niini human nabangga ang gimanehong motorsiklo sa Jr Borja St. ning siyudad; Roroy Eduria, 29, minyo, lumad nga taga Bukidnon, mihubag ang ulo human milagpot gikan sa iyang motorsiklo.

Nabanggaan ni Eduria si Mary Jane Absin, lumad nga taga lungsod sa Jasaan, mitabok ang biktima nga wala sa saktong panghunan-huna human apektado og ilimnong makahubog niadtong Domingo mga alas 4:45 sa hapon sa Tablon ning siyudad.

Uwahing biktima ang tulo ka mga bata nga mao sila si Jenny Ann Languido, 14, taga Zone-1, Cugman, kinsa nabun-og ang lawas human nabanggaan sa motorsiklo nga gimaneho ni Mike Larita nga nakaangkon sab og samad sa nawong; Ephraim Dumdom, 7 anyos, taga Camaman-an ning siyudad ang mitabok sa kalsada ug nabanggaan; Jhon Kierben Agbalog, 7, lumad nga taga lungsod sa Alubijid, kinsa gihatod kagahapon sa buntag sa iyang amahan paingon sa tunghaan niini dihang nakabangga og iro ang amahan hinungdan sa pagkaligid sa motorsiklo.

Ang maong mga biktima nagpabilin karon nga giatiman sa mga doktor sa NMMC ning siyudad.