SUPERBALITA CEBU

Niñal: Cancelled

Eskina

BAD news,” giingnan ko sa akong misis usa ka buntag sayo ning buwana. “Unsa man?” nangutana ko. “Cancel inyong Il Corso gig,” miingon siya.

“Way ‘blema,” ingon ko. “Naa pay daghang gig.” “Cancel pud ang Ginatilan,” ingon siya. “Ok ra. Duha ra na ka gigs nga cancelled,” ingon ko. “Inyong Bohol gig cancel pud,” ingon siya.

Wa na ko motingog. Nagsugod na kog kaalarma. Di na ni maayo. Dako-dako pud nga income ang na-thank you. Naa na ra ba toy apelyido mga kwartaha. Ang usa balay. Ang usa tuition sa mga bata. Ang usa binuwan nga konsomo’s beer.

“Sige lang. Naa pa tay laing gig gawas sa banda,” akong giingnan akong asawa. “Cancel pud imong talk sa CTU,” ingon siya.

Pagkaahak baya.

“Hasta imong Consolacion talk cancel pud,” puno pa ni misis.

Niining dapita ningyaka na ko, ug daw bata mitiyabaw tama’s ginhawa. “Waaaaaahhhh, Lord, unsay akong sala nga nahimo?”

“Hilom oy. Mauwaw ta’s mga silingan,” ni misis pa. “Ay’g kaguol. Naa pa tay daghang order sa printing nato. Ginatos nang mga tshirt diha nga printahanan,” ingon siya.

Tinuod, gawas sa mga gigs sa akong banda, naa pud mi laing raket ni misis. Nagtukod mig digital printing business nga mo-cater sa mga printing needs sa mga kompanya, mga eskuylahan, gobyerno ug uban pa. Kasagaran sa mga order may kalabotan sa events, mga kalihokan nga nag-involve og panagtapok sa mga tawo. Ug puyra buyag, pagsulod sa tuig, aduna sab intawo’y nanulod nga mga order.

“Naa koy bad news,” ako na sab ang miingon ni misis. “Unsa man?” nangutana siya. “Cancel pud tanang order nato sa printing,” miingon ko.

“Waaaahhh,” si misis na ron ang mitiyabaw, dayong yaka morag bata. “Hilom diha oy. Mauwaw ta’s mga silingan,” ingon ko.

“Waaaahhhh, waaaaahhhh,” may nadunggan mi nga tiyabaw sa gawas. Daghan sila. Ang among mga silingan! “Nagsira among opisina. Wa na mi trabaho... waaaaahhhh,” tiyabaw pa nila.

“OK, relax na ta. At least di ra kita ang naigo ining bayrusa ni,” ingon ko ni misis. “OK, kalma na ko,” mitubag siya inubanan og pahiyom.

Ug nanggawas mi, nangadto’s mall ug nang-hoard og alcohol.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph