GIDEKLARAR ni Cebu City Mayor Edgardo Labella ang usa ka liquor ban sa tibuok syudad nunot sa nag-anam ka higpit nga community quarantine tungod sa COVID 19.
Lahi kini sa liquor ban nga gipatuman atol sa Sinulog grand parade. Lahi usab kini sa liquor ban nga gipatuman matag eleksyon kansang kalapasan matawag nga usa ka election offense.
Kining maong liquor ban matawag nato nga nunot sa social distancing kay sagad sa mag-inom magdug-ol man. Ang mas labing grabe kanang magtagay nga usa ray baso.
•••
Gipatuman sa gobyerno ang usa ka enhanced community quarantine sa tibuok islaxsa Luzon agi og panagang sa pagkuyanap sa corona virus. Nagsugod kini sa alas 12 sa kaadlawon niadtong Marso 17 ug hangtod sa Abril 13.
Unsa man ang gibasihan niini? Si Executive Secretary Salvador Medialdea niingon nga subay kini sa Proclamation 922 ug 929 ni Presidente Rodrigo Duterte ug sa Republic Act No. 11332, ang Mandatory Reporting of Notifiable Diseases and Health Events of Public Concern Act.
Mao kini ang balaod naghatag og gahum sa presidente sa pagdeklarar sa usa ka epidemic ug usa ka national public health emergency sama sa gihimo sa pangulo labot sa corona virus.
•••
Ubos sa enhanced community quarantine sa tibuok Luzon gihigpitan ang pagbiyahe sud-gawas sa Luzon, lakip sa Metro Manila o National Capital Region diin nagtipun-og ang kinabag-an sa populasyon.
Siradoan ang mga airport ug pantalan. Ihunong ang mass transportation. Apan magpadayon ang delivery sa mga pagkaon ug mga kargamento. Padayon usab nga bukas ang mga supermarkets, public markets, mga botika ug mga negosyo sa pagkaon, panglawas, tubig ug kuryente, banking and finance, business process outsourcing ug mass nedia.
Karon pa makasinati ang Pilipinas sa usa ka national public health emergency. Tabang tang ranan nga di mokuyanap ang virus nga moresulta sa COVID 19. Labi pa kadtong mga himsog og lawas nga mahimong di masakit apan carrier sa sakit. (edbarrita@gmail.com)