SAYONG pinaskohan ang madawat sa mga empleyado sa kagamhanan sa dakbayan sa Lapu-Lapu.
Kini human nga aprobado na sa konseho sa dakbayan ang pagpang-apud-apod sa midyear bonus sa mga empleyado subay sa krisis nga nasinati kalabot sa Covid-19.
Niadtong Martes, Marso 17, mipahigayon og special session ang konseho sa dakbayan alang sa among katuyoan.
Si Konsehal Rico Amores maoy mi-sponsor sa naasoyng resolution nga giuyonan sa iyang mga kauban.
Matod ni Amores nga nunot niining krisis sa Covid-19 diin gipaubos sa general community quarantine ang kadaghanan ug giawhag sa pagpundo sa ilang mga panimalay hayan gikatakda ang publiko nga mag-stock ug pagkaon sa ilang mga panimay.
Ug aron adunay mapalit ang mga empleyado sa dakbayan hayan angay ra usab nga tagaan sila sa ilang midyear bonus nga mahulog ug usa ka buwan nga sweldohan.
Uyon usab si Lapu-Lapu City Mayor Junard “Ahong” Chan sa naasoyng lakang ug mipasalig sa paghatag na sa mid-year bonus sa mga empleyado.
“Ato nang gituyo para pud dunay makuot ang atong mga kaigsuonan,” pagpasabot ni Amores.
Gawas sa mga empleyado sa city hall giaprobahan na usab sa konseho sa dakbayan ang paghatag ug sayo sa midyear cash incentives sa senior citizens ug Persons with Disabilities (PWDs), diin kasagaran sa daling mataptan sa Covid-19.
Balor P3,500 ang dawaton sa senior citizens ug PWDs sa dakbayan.
Sa Hunyo pa unta kini madawat samtang, laing P3,500 adto na sa buwan sa Disyembre. (GCM)