SUGOD kagahapon, Miyerkules, Marso 18, gidid-an na sa pag dunggo ang tanan nga mga barko gikan sa apektado nga mga isla ug uban pa sa mga pantalan sa lalawigan sa Sugbo.
Kini ubos sa giluwatang kamandoan ni Gob. Gwendolyn Garcia nga mao ang Executive Order (EO) No. 5-F.
Bisan niini, gitugotan gihapon ang pag pasulod sa mga produkto sama nalang sa baboy, uban pa nga mga pagkaon og ang balas ug graba.
Gisaysay ni Garcia ang protocols alang sa mga mosulod sa delivery trucks sa mga pantalan sa Sugbo atol sa pakighinabi sa mga tigbalita.
Matod ni Garcia nga i-check sa Bureau of Quarantine o sa port officer ang temperatura sa driver ug sa truck boy og kinahanglan nga mag disinfect sila una kini maka balik sa sakyanan.
Kini sama sa pagkaligo hinungdan nga kinahanglan nga mag dala og sinina, sapatos o sinelas ang drivers aron ilisan niini ang gisul-ob atol sa pag abot sa pantalan lakip na usab ang balon nga pagkaon.
Dili pwede nga mo-naog ang driver ug truck boy sa trucks.
Kon mahuman na kini pag disinfect ubanan kini sa kapulisan sa delivery points.
“Ang gipangutana, tingali unya ug daghan ang deliveran di unya ma-ato. Ang atong hangyo nga sabutan sa mga kustomer nga usa ra ka point of delivery unya adto nalang mag bahin bahin ang mga kustomer ug asa ni nila ideliver aron dili usab ma over-burdened ang atong mga PNP personnel nga mag kuyog kuyog ug asa ni ilang adtoan”, matod ni Garcia sa mga tigbalita sa Marso 17, 2020.
Apan matod ni Garcia nga mas maayo kon kadtong mga kargamento nga gikan sa laing isla, dunay trucks gikan dinhi sa Sugbo nga mahimong mo kuha niini.
Ang kamandoan lakip sa Implementing Rules and Regulations (IRR) sa Executive Order No. 5-F ni Garcia.
Tungod sa krisis nga giatubang karon sa nasud wala usa’y kaslon, bunyagan o mo pahigayon ug mga pundok kon mahimo aron malikayan ang pagkatap sa kagaw sa isig ka-tawo.
“As much as possible mo-likay ta for all other gatherings, sama pananglit weddings, bunyag kung tinud-anay man gani na nga gugma pwede man siguro na mohuwat. love can wait,” matod ni Garcia.
Alang sa misa o simba giawhag ang tanan nga kon mahimo mag live streaming lang una sa social media.
“Foremost, It was agreed upon tungod sa pagkakaron because of what we are facing we should avoid large gatherings kay it has already been proven nga transmission is done from person to person.." matod ni Garcia.
Hinuon, mamahimo ra ang haya ug lubong.
Apan gi-hatagan ug pag tagad ni Garcia ang strikto nga pagpatuman og pag tuman sa curfew lukop lalawigan.
Aron malikayan ang sobra nga pakighugoyhugoy sa uban nga posible nga may dala nga sakit. (ANV)