IMMEDIATE nga mga sakop sa pamilya sa drayber sa mga pribadong motorsiklo gitugtang maka back ride sa mga motorsiklo, matod sa Office of the Presidential Assistant for the Visayas (OPAV) sa Miyerkules, Marso 18, 2020.
Sa usa ka pamahayag, si Opav Secretary Michael Dino nimando sa Land Transportation Office (LTO)-Central Visayas, human sa usa ka tigom tali kang Regional Director Victor Caindec, nga tugtan ang back riders sa pribadong mga motorsiklo basta ang angkas sakop sa pamilya.
Ang sakop sa pamilya naglakip sa bana, asawa, ug mga anak nga nagpuyo lang sa usa ka balay.
Ang back rider kinahanglang makapresentar og identification (ID) card isip pagmatuod sa ilang relasyon sa drayber.
Apan, ang direktiba mahimong mausab labina kon ang Central Visayas ipailawom sa Enhanced Community Quarantine.
Nagsugod na
Gisugdan na sa Cebu City Police Office ang pagtutuk sa mga motorsiklo nga adunay angkas ilabi na ang mga habalhabal nunot sa pagpatuman sa social distancing.
Matod ni Police Colonel Engelbert Soriano, officer-in-charge sa kapulisan sa siyudad sa Sugbo, nga kadto lang pamilya ang tugotan nga makaangkas sa motorsiklo.
Iyang gipasabot nga way rason nga ipatuman ang social distancing sa magtiayon nga nag-uban na daan sa ilang panimay.
Niadtong miaging semana, ang CCPO nibadlong na sa mga habal-habal driver nga di na magpaangkas sa ilang motorsiklo.
Giklaro hinuon ni Soriano nga way dakop nga mahitabo sa mga milapas, apan kuhaon ang ngalan sa driver ug plate number sa motorsiklo.
“Case to case basis na lang ang ginagawa namin. Lagi naman may humanitarian consideration,” matod ni Soriano.
Gibadlong
Samtang 13 ka mga menor de edad ug 20 ka nga hamtong na ang gibadlong ug gipapauli sa ilang pinuy-anan atol sa ilang pagpatuman sa Executive Order 52 ni Mayor Edgardo Labella.
Duna pay mga senior citizen ang nakita sa gawas ug mga checkpoint areas nga migawas sa ilang balay aron mamalit og pagkaon.
Tungod kay sayon sila nga mataptan sa bisan unsa nga matang sa virus, niawhag si Soriano nga di nalang kini mogawas.