USA ka lalaki ang nadala sa ospital human gitigbas sa iyang amahan didto sa Purok 10, Sityo Ambawan, Barangay Osme¤a, lungsod sa Compostela, Compostela Valley (Comval) province.
Giila ang biktima nga mao si alyas Junbert, 17, ug molupyo sa Purok 10.
Ang suspek mao mismo ang amahan sa biktima nga si Tito Awit, ug 55 anyos.
Sa report nga nakuha gikan sa Comval Province Police Provincial Office nasayran nga nahitabo ang pagpaningbas pasado alas 10:00 sa gabii niadtong Sabado.
Nag-inom matud pa ang suspek uban ang mga higala didto sa ilang lugar dihang gibadlong sa iyang anak.
Apan inay mopatuo nasuko naman hinuon ang suspek ug gitigbas ang biktima.
Nahiagum og mga samad tinigbasan sa kalawasan ang biktima nga dali sab nga gidala sa ospital.
Ang suspek malampusong nasikop sa mga opisyal sa barangay.
Gitanggong dayon sulod sa selda ang suspek. Kasong frustrated homicide ang gihikay sa kapulisan batok kaniya. (Marvin Pineda)