(“Ug daghan ang nanaglakaw nga kalabera kay sa mga buhi... daghan diayng dagko og mga mata nga wala makakita sa Adlaw.” Panan-awan – Jose L. Tomarong)
SAMTANG kita mga buhi pa
Di gayud kita makatugkad
Sa lintunganay nga gahom sa Diyos.
Di kita makatugkad sa giladmon
Sa Iyang pagka Magbubuhat.
Ning bag-o tang kalibutan
Inanayng gi-anay ang moralidad
Sa tawo. Nahanaw na ang bili
Sa tawhanong katungod.
Ang mga berso ug pagtulon-an
Sa Balaang Kasulatan wala na
Masilsil sa atong alimpatakan.
Ang mga panid sa Bibliya
Nahimo nang mga tabanog
Nangasangit sa patayng kahoy.
Apan ang mga mata sa pagtuo
Nagpabilin sa tagsa-tagsa kanato.
May paglaom mobalik ang timgas
Nga Kahayag sa Iyang pagkabanhaw.
Sa kinauyokan sa atong kasingkasing
Buka ang mga mata sa atong pagtuo.