MATIGAYON na gayod ang daw gikahadlokan sa mga tawo ning rehiyon, ang pag-lockdown diin sulod sa 14 diyas sirado una ang lugar sa tanang matang sa transportasyon sa yuta (by land) dagat (sea) ug kahanginan (air).
Sugod kaganihang ala una sa kaadlawon, Marso 19, 2020, adlaw'ng Huwebes, sirado ang tanang agianan sa Davao Region. Lockdown na, diin buot-pasabot dili na tugtang dunay makasulod sa Davao Region nga mga tawo gikan sa kasikbit nga rehiyon.
Sumala sa chairperson sa Regional Peace and Order Council ug sa Regional Development Council nga si Davao City Mayor Sara Duterte-Carpio nga subay kini nga desisyon nga ilang nahukman diha sa kaubanan sa Davao Region Covid-19 Task Force aron malikayan ang pagkatag sa virus.
"Sugod 12 midnight (March 19), i-dismantle na nila ang travel ban, ang ilahang prohibitions diha sa Lasang checkpoint tapos ibalhin na ang ban o ang lockdown didto sa mga entries sa Davao del Norte, Davao de Oro, ibalhin na ang travel ban didto provided nga tanan mo-comply sa katong ginaingon sa doktor nga kampanya nato diri sa Davao nga tulo kabuok; magpuyo ta sa balay, nag-create tag distance with each other 2 meters, tapos frequently wash hands with soap and water,'" ingon ni Mayor Duterte-Carpio sa dxAB Radyo Patrol 1296.
Sa tugpahanan sa dakbayan, temporaryo nga wala nay motugpa ug molupad nga eroplano sud sa 14 diyas.
"Atong international airport, stop una ang flight from and to ngari sa Davao City... So didto sab sa mga entries sa Davao Region isarado nato then pangitaon nato for the next 14 days katong mga nagkasakit," dugang sa mayora.
Subay sa gipagula nga impormasyon sa Davao Region Covid19 Task Force labot lockdown sa Davao Region gilangkuban kini sa mga probinsya sa Davao del Sur, Davao del Norte, Davao de Oro, Davao Oriental ug Davao Occidental.
Dugang ni Mayor Inday nga di mabalaka ang mga tawo sa Davao Region gumikan kabiyahe gihapon, apan ngari lang palibot sa rehiyon ug mosunod sa mga palisiya nga ginahimo sa mga checkpoints.
"Kita lang dinhi sulod sa region ang puwede magtuyok-tuyok," ingon sa mayor apan gitugtan kadtong mga tawo nga duna gayo'y importante kaayo nga lakaw. Ang dili importante, gihangyo sa mayor nga mas maayong magpundo nalang sa balay.
Kung madungog sa katawhan ang lockdown, makuyawan gayod, apan usa kini ka kaayohan aron malikay ang tanan sa Covid-19. Hinuon, pag-eksperimento kini sud sa 14-diyas aron mapangita ang mga dunay balatian nga posibleng nataptan sa virus, ug pamaagi nga di na mokatag pa.
Atong suportahan ang lakang karon sa atong gobyerno, inubanan sa pag-ampo ug magtinabangay kita sa pagbatok niini nga virus nga mipatay na og daghan kinabuhi sa tawo sa tibuok kalibutan.