Midaga'g medalya

SI DIANA Mae Memoracion sa Emar Human and Environmental College (Ehec) midagan og usa ka gold medal taliwala sa injury, samtang si Sharmaine Yonson sa University of Mindanao (UM) miangkon sab og tulo ka bulawan sa Davao City Prisaa Meet 2020 women's athletics competition, pipila ka adlaw una gipailawom sa community quarantine ang Davao City tungod sa Covid-19.

Si Memoracion nanguna sa women's 400-meter hurdles human mioras og usa ka minutos, 13.14 segundos.

Ang kauban niya, Frencis Mae Dayon miangkon sa silver, mioras og 1:25.20.

Ang 22-anyos nga ICT sophomore nagsulti, "Injury akong tiil."

Dugang niya, "Pero dugay najud nako ni ginaantos Maam tapos murag karun dili naman kaya sakit naman kaayo."

Miangkon sab siya og upat ka silvers sa 4X400m relay, 4X100m relay, 800m run ug 1,500 run.

Samtang ang 22 anyos nga si Yonson, senior Accounting technology student, nagkanayon nga miresulta ang iyang kadaugan sa hugot nga pagbansay.

Si Yonson midaug sa 800m, 1,500m ug 4X400m golds lakip na silver sa high jump.

"I expected gold because I hardly trained for it."

Ang host nga UM, mikolekta og 13 ka bulawan, lima ka silver ug usa ka bronse samtang si Ehec mipupo og duha ka gold, 4 silvers, 2 bronse.

Ang Rizal Memorial Colleges (RMC) mipupo og gold, duha ka silvers ug upat ka bronse.

Si Leah Mae Elicot nanguna sa high jump aron hatagan og luna ang RMC og nag-inusarang gold sa women's athletics.

Sa men's side, ang UM nanguna sa trackfest human midagan og 16 ka bulawan, 9 silvers ug usa ka bronze.