USA ka pasyente nga naa sulod sa balay tambalanan sa siyudad sa Cotabato ang nagpositibo sa coronavirus disease (Covid-19).
Kini subay sa gipagawas nga Department Order 2020-05 sa Department of Surgery sa Cotabato Regional and Medical Center (CRMC) sa dakbayan.
Nasubay nga ang biktima nagagikan sa Pagadian City apan nagpatambal sa CRMC ug dunay mga paryente sa dakbayan.
Nagpatuman na og additional precautionary measures ang CRMC sa tanan nga mga empleyado, nurses ug mga doktor kabahin sa Covid-19 gawas lamang sa mga emergency cases.
Ang CRMC nagpatuman sab sa social distancing, disinfection ug self-quarantine guidelines.
Sa tanan nga mga doktor ug nurses nga nagtrabaho sa emergency room ug Out Patient Department (OPD), kinahanglan nga mogamit og face mask, goggles ug uban pa nga mga personal protective equipment.
Samtang sa Marawi City, gikompirma ni Bangsamoro Parliament Member Zia Alonto Adiong, tigpamaba sa Lanao del Sur Provincial Anti-Covid-19 Task Force, nga usa ka pasyente sa Amai Pakpak Hospital nga namatay gumikan sa maong sakit.
Ang biktima usa ka Islamic Missionary o Tablighs nga gikan sa Malaysia ug kauban sa pasyente sa CRMC nga nagpositibo sa Covid-19.
Gipangita na sab sa Ministry of Health (MOH) sa Bangsamoro Autonomous Region in Muslim Mindanao (Barmm) ang mga kauban sa mga biktima nga mitambong sa aktibidad sa Malaysia nga moabot sa 215 nga sagad nagagikan sa Bangsamoro region.
Apan giklaro ni DOH-Barmm Minister Saffrullah Dipatuan nga dili molupyo sa Marawi City ang namatay sa Amai Pakpak Hospital apan taga Iligan City gumikankay Covid-19 free pa ang Bangsamoro Region.
Gipatuman na ang temporary lockdown ni Mayor Cynthia Guiani Sayadi sa Cotabato City kon diin wala nay makagawas nga molupyo ug wa na say makasulod sa siyudad. (Edgar E. Fuerzas)