Sugilanon: Walay ‘forever’

Sugilanon: Walay ‘forever’

WALA magdahom si Joselito nga makapauli siya ning adlawa sa Pilipinas. Daw dili siya makatuo nga ania na diay siya karon sa Mactan-Cebu International Airport nga nahimutang sa Lapu-Lapu City. Dili pa dugay nga mitugpa ang abyon nga iyang gisakyan gikan sa Middle East.

Naghinam-hinam na siyang makita ug mahimamat pag-usab ang iyang ginikanan ug ang duha niya ka manghod nga babaye. Nahimong surprisa ang iyang pagpauli karon tungod kay nanera ang kompaniya nga iyang gitrabahuan sa Middle East. Imbes tulo ka tuig ang iyang kontrata, nahimong duha na lang ka tuig ang iyang pagtrabaho didto.

Naahat siyang manimpalad sa laing nasod kay lisod ang ilang kahimtang sa bukid diin siya nagdako. Apan nakahuman siyag eskuyla sa kolehiyo sa kursong ‘hotel and restarant management (HRM)’ tungod sa suporta sa iyang ginikanan pinaagi sa gitikad nga gamayng yuta sa iyang Tatay Lydio. Miabag sab ang iyang Nanay Senia pinaagi sa pagpanahi og mga sinina sa ilang mga silingan sa barangay Catmonan.

Buot siyang makatigom og dakong salapi tungod kay iyang gisaaran si Zima, iyang hinigugma, nga magpakasal sila inigpauli niya human sa iyang kontrata didto sa laing nasod. Ensakto sab nga mahuman sa iyang pagtuon si Felipa, nunod niya nga igsuon, sa pagka magtutudlo sa elementarya. Si Felipa na sab ang motiwas paggasto sa pag-eskuyla ni Dahla nga anaa pa sa hayiskol.

Mipara si Joselito og taksi. Human mapahiluna ang iyang dakong bag gipadagan dayon sa drayber ang taksi. Nagpaingon sila karon sa Pier 3 diin nagpaabot ang mga ‘fast craft’ paingon sa Tubigon, Bohol. Mipahiyom siya ug nahimuot ang iyang galamhan nga naghunahuna kon unsa kahay bation sa iyang mga minahal sa kinabuhi ning iyang kalit nga pagpauli karon. Ilabi na si Zima.

Hapon na siyang miabot sa ilang lungsod sa Calape. Milahos siya sa ilang pinuy-anan sa barangay Catmonan sakay sa habal-habal. Nanghugyaw ang tanan dihang nakakita kaniya nga nagdanga-danga sa dalan. Nalipay sila sa iyang paghiabot.

“Pa-amena ko, Nay Senia, Tay Lydio,” ni Joselito nga mikab-ot sa tuong mga kamot sa iyang ginikanan kinsa daw wala pa makatuo sa iyang paghiabot. Migakos kaniya ang iyang inahan nga gilugmawan ang mga mata sa mga luha sa kalipay.

“Lain pay ato, Nay, si Zima... kumusta na siya?” pakisayod ni Joselito bahin sa iyang hinigugma.

Mikisdong ang dagway sa iyang nanay Senia. Nagtinan-away ang iyang duha ka manghod ug ang iyang amahan.

“Dong Lito... naminyo na si Zima og Amerikano. Tua na siya sa Amerika, gidala sa iyang bana. Pasayloa mi nga wa magpahibawo nimo sa didto pa ka sa abroad. Dili mi gusto nga maguol ka didto,” pangatarungan ni nanay niya Senia.

Sama sa midat-og kaniya ang tibuok langit human madungog ang mga pulong sa iyang inahan. Dili siya makatuo nga gibudhian siya ni Zima. Hinuon sa didto pa siya sa Middle East, dihay higayon nga misantop sa iyang hunahuna ang mga katahap. Talagsa na lang si Zima nga mobawos sa iyang mga ‘chat.’ Nalarawan sa iyang panagway ang kaguol. Dihay gamayng kusi nga iyang nabati sa iyang kasingkasing. Tinuod nga nahigugma siya kang Zima, apan wala na siyay mahimo karon. Si Zima maoy nagguba sa ilang mga panumpa. Mihalang ang iyang mga mata, apan napugngan ang iyang mga luha tungod sa maymay ug alam-alam sa iyang ginikanan.

“Nakasabot kami sa imong gibati, Dong Lito. Apan ayaw kini ikaguol kaayo. Daghan pang mga babaye sa kalibutan,” ni tatay niya Lydio dungan ang pagpikpik sa iyang abaga. “Ania pa man sab kaming imong pamilya nga nagmahal nimo.”

Mibuhi si Joselito og halawom nga panghupaw ug migakos sa iyang amahan. Sulod sa iyang galamhan nahupay ang kasakit nga iyang gibati gumikan sa tambag sa iyang ginikanan. “Wala gyud diay ‘Forever’!” Nakatuaw siya. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph