ANG kurapsiyon sa konseho sa siyudad sa Davao nga kanunay gigamit nga isyu sa Team Nograles gitubag na ni Bise Mayor Sara Duterte atol sa programang "Gikan sa Masa, Para sa Masa" sa ABS-CBN niadtong Dominggo.
Ang bise mayor nagpahayag human siya giingong gidaot sa ilang kaatbang sa politika bahin sa wala paghingalan sa mga konsehal nga giingon nga midawat og salapi gikan sa mga developers.
"Dili nako sila pakaulawan pinaagi sa pagpangalan nila sa publiko, pulong-pulong ug sa newspaper kay naa na silay pamilya," ni Duterte human siya gisaway nga gipanalipdan niini ang mga konsehal nga nalambigit sa LDBM.
Si Duterte nagpahayag nga kung iya pang gipanalipdan ang mga konsehal, dili unta niya ipahibalo sa publiko nga dunay nakadawat og salapi sa mga developers.
"Asa man mo nakabalo? Di ba gikan sa ako? Naay mihatag nga developer pero akong gipauli kay dili ko mosugot nga dunay modawat og kwarta," pasabot sa bise mayor.
Si Duterte nagsulti nga dili na angay panganlan ang mga konsehal sanglit napasaka na ang kaso sa Ombudsman Mindanao.
"Kaming mga elected officials, naa mi gitawag nga common courtesy. Ikaw Karlo, wala ka nakasulay magkonsehal, kapitan ug vice mayor mao nga dili ka makasabot. Staff ka lang sa opisina," dugang pasabot ni Duterte.
Si Duterte mitubag sab sa isyu nga walay "check and balance" ang lokal nga kagamhanan sanglit amahan ug anak ang nagpadagan sa siyudad.
"Para maingon nga impartial ko as vice mayor, wala ko nag-preside sa pag-approve sa mga supplemental budget. Gawas niini, akong giingnan si Atty. Zuleika Lopez, secretary sa Sangguniang Panlungsod, nga iyang i-post ang schedule sa mga budget hearings," ni Duterte.
Ang bise mayor midugang nga ang tanang tawo mamahimong makapangutana atol sa budget hearing nga gipangulohan ni Konsehal Myrna Ortiz kung unsay gastohan sa salapi nga ilang gigahin sa supplemental budget.
"Wala ko milingkod just to show to them that there is impartiality in the city council," pahayag ni Duterte.
Ang bise mayor misaway kang Karlo Nograles, kandidato sa pagka-kongresista, gumikan sa pagtamay niini sa mga babaye.
"Karon ginapilit na niya bawion na, pero gikan ni sa iyang baba na 'ang babae lampa gyud'," ni Duterte ngadto kang Nograles kinsa kanunay nagsaway kaniya ug sa iyang amahan sa mga programa sa telebisyon ug radyo sa Team Nograles.
"Sige na siya Duterte-Duterte, nakalimot siya nga ang kalaban niya si Councilor Mabel Sunga-Acosta," pahayag ni Duterte kinsa midugang nga si Acosta maoy best councilor sa tibuok nasud.
Si Duterte igo lang mitubag sa mga pagsaway sa kampo sa mga Nograles batok kaniya ug sa iyang amahan nga si Mayor Duterte.
"I dedicate this fight to you Speaker Nograles and Karlo Nograles. Wala koy kasuko ni Ben de Guzman kay gigamit ra na siya. Si Joji Bian gigamit lang ang iyang kwarta," pahayag sa bise mayor. (AD)