SULIRAN sa pinansiyal ang motibo nganong nagpakamatay pinaagi sa paghikog ang usa ka ginang sulod sa ilang balay niadtong Dominggo.

Ang biktima giila sa kapulisan nga mao si Jennifer Angcon, 24, minyo, nagpuyo sa Bolinao Site, Kilometro 12, Barangay Sasa, siyudad sa Davao.

Si Senior Police Officer 2 Henry Balbiran sa Sasa Police Station nagbutyag sa iyang spot report nga napalgan ang biktima nga nagbitay sa alas 9:00 sa gabii niadtong Dominggo.

Matud ni Balbiran nga ang biktima nasiplatan sa iyang bana nga nagbitay sulod sa ilang balay gamit ang usa ka nylon nga pisi.

Si Sofronio Angcon, bana sa biktima, nakurat sa iyang nakita mao nga nangayo siya og police assistance aron tabangon ang iyang asawa.

Sa paghiabot sa mga otoridad, gideklara nga patay na ang biktima mao nga gidala ang iyang patay'ng lawas didto sa Rivera Funeral Homes.

Mga imbestigador nagbutyag nga walay silay nakita nga timailhan (foul play) nga gituyo ang kamatayon sa biktima.

Mga silingan sa biktima nagbutyag sa kapulisan nga pipila ka semana ang nilabay ilang nadungog ang magtiayon nga kanunay mag-away tungod sa suliran sa pinansiyal.

Ang pahayag sa mga silingan maoy naghatag og ideya sa kapulisan nga naghikog ang biktima tungod sa problema sa kwarta. (AD)