Compio: Lockdown ug himuon sa community quarantine

Compio: Lockdown ug himuon sa community quarantine

KUMUSTA ang pag-self quarantine mga higala? Ops, sugod kagahapon sa ala una sa kaadlawon, Huwebes, Marso 19, 2020 gipahigayon ang ‘Regionwide Lockdown’ ngari sa Davao Region, kini gihimo aron malikayan ang pagkuyanap sa Coronavirus Desease 2019 (Covid-19) sa atong komunidad.

Ang Davao Region gilangkuban sa mga probinsya sa Davao de Oro, Davao Oriental, Davao del Norte, Davao del Sur ug Davao Occidental, diin duna kini unom ka mga siyudad, mao ang Tagum City, Island Garden City of Samal (Igacos), Panabo City, Digos City, Mati City ug Davao City.

Daghan man gud nangutana nga kung siya taga Digos City puwede ba siya makaadto sa Davao City, basin og dili na daw siya kauli sa Digos City. Ang tubag niana, puwede kaayo, puwede makabalik gumikan kay Davao Region man nasakop ang Digos.

Gipasabot sa awtoridad nga kadto lamang tugtan ang mga tawo nga dunay importante nga lakaw sama sa pagpa-ospital, pagpalit og tambal ug ang pag-transport og mga pagkaon diha sa pagbiyahe.

Gidid-an ang pagsuroy, paglakaw nga motabok sa laing siyudad ngari sa Davao Region kung walay kinahanglan, gani ang taga Davao, gidid-an nga motabok sa Samal Island kung ang tuyo mangaligo lang.

Ang gipasabot sa regionwide lockdown gidid-an ang pagsulod sa mga tawo ug sakyanan gikan sa kasikbit nga rehiyon, ang rehiyon nga kasikbit sa Davao Region mao ang Caraga Region, Region 12, Barmm ug ang Northern Mindanao, buot-pasabot kung gikan ka aning mga region-na, dili ka kasulod sa Davao Region, ug kung gikan ka sa Davao Region puwede ka makagawas, pero ang problema karon, dili sab ka kasulod sa ilang region, ug di na sab ka kabalik sa Davao Region sud sa 14-diyas, busa, magpuyo nalang ta sa atong panimalay.

Kanus-a ba kini matapos nga lockdown? Ang awtoridad naghatag niini og 14-diyas, apan kung molala ang kaso sa nasud, ug labi na masudlan og daghang ihap sa Covid-19 ang Davao Region, mahitabo gyud ang pagpataas pa sa dugang ihap sa mga adlaw niining nahisgutan nga regionwide lockdown.

Maibanan gyod ning panahona ang savings nato sa bangko, apan hinayhinay lang, kay basin wala pa nahuman ang community quarantine, mahurot na. Sa mga wala gyo’y savings, kini ang panahon nga mohimo kita og mga pamaagi aron matubag ang panginahanglanon sud sa panimalay.

Kung mamahimo, mohimo kita og ginagmay nga negosyo diha sa tugkaran, apan ipatuman lamang gayod ang social distancing ug kinahanglan dunay face mask. Ang mga negosyo nga maayo ning panahona, kining barbecue kay mopalit man gyud ang tawo og sud-an, kusog kining barbecue labi na panahon sa hapon ug kinahanglan, lami kini og lasa aron mobalik ang atong mga kustomer.

Ning kasamtangan, naa sa Davao Region usa, apan suma sa health officials nga anaa na kini sa maayong kahimtang ug giingong tulo na ka mga patients under investigation (PUIs) ang namatay, ngari.

Ampo lang ta mga higala, ug makanunayon ang pagsunod sa mga guidelines nga gipatuman karon sa atong gobyerno aron malikay kita sa Covid-19 nga maoy nakapa-krisis sa kalibutan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph