DAVAO DEL SUR -- Gipahugtan na sa Inter-Agency Task Force (IATF) Covid-19 ang ilang boundary checkpoints aron maluwas ang probinsiya sa pagkuyanap sa pandemic coronavirus disease human nagpatuman ang Davao Region ug lockdown status sugod alas 12:01 sa tungang gabii, Huwebes, Marso 19.
Ang TF gilangkuban sa nagkadaiyang ahensiya sa gobyerno sama sa Davao Sur Police Office (DSPPO), Provincial Health Office, 39th Infantry Battalion sa Philippine Army, Bureau of Fire Protection, Local Government Units ug Philippine Coast Guard.
Unang mihimo og tigum ang IATF ala 1 sa hapon niadtong Miyerkules didto sa DSPPO conference room diin gihisgutan ang mga estratehiya sa implementasyon sa guidelines sa checkpoints ug paghimo sa provincial-wide community quarantine isip suporta sa region-wide Community Lockdown sa Davao Region.
Usa sa mga lakang sa kapulisan mao ang pagmuntar og Inter-Agency checkpoints didto sa Barangay Darong, Santa Cruz; Barangay Kinuskusan, Bansalan; Barangay Kiblagon, Sulop; ug uban pang entry points sa probinsiya.
Ilawom sa direktiba, way tugtan nga indibiduwal nga makasud sa Davao Region gawas sa mga sakyanan nga nagdala og kargamento, nga dunay usa ka drayber ug usa ka helper, apil ang mga hayop.
Ang ubang helper mahimong magpabilin sa checkpoint ug huwaton ang ilang sakyanan nga makahawa sa Davao Region.
Gitugtan ang nagpuyo sa Davao Region nga mobiyahe sa laing dapit gikan Marso 19 apan di sila mahimong mobalik sud sa 14 ka adlaw.
Nagpahinumdom sab si Lupaz sa tanang tropa nga magpabiling kalmado ug mohatag og respeto sa pagpatuman sa Police Operational Procedure ug uban pang PNP Command Guidelines apil ang Executive Order sa Community Quarantine nga gipaguwa sa kagamhanang probinsiyal. (Orlando B. Dinoy)