GIMANDO ni Davao City Mayor Sara Duterte-Carpio, pinaagi sa sa managlahi nga executive orders niadtong Huwebes, Marso 19, ang pagsuspende sa tanang establisemento luyo sa pandemic nga hulga sa coronavirus disease (Covid-19).
Ubos sa Executive Order No. 15, mga establisemento gimandoan nga manira nga moepekto Huwebes, Marso 19, sugod alas sa 5 hapon, hangtud nga malibkas na ang state of public health emergency.
Kini naglakip sa mga internet shops, gaming stations, bilyaran, videokihan, basketbolan, badminton courts, bowling alleys, sinehan, bingo-han, e-gaming nga establisemento, lotto outlets, kids’ playrooms, video arcades, spas, massage parlors, beauty salons o parlors, ug peryahans.
Nagpagawas sab ang lokal nga kagamhanan pinaagi sa Executive Order No. 16, nga nagmando nga tanang mga malls ug mixed-use buildings sirad-an ang tanang mga di kinahanglanon nga mga tindahan, gawas lamang sa mga supermarkets, pharmacies, bangko, mall inhouse department stores, medical laboratories, mga klinik sa mga doktor ug dentista, sugod alas 11:59 sa gabii sa Marso 19, hangtud nga malibkas na ang state of public health emergency.
Ang duha ka mga EOs gihimo subay sa pagtuman sa state of public health emergency nga gideklara ni President Rodrigo Duterte.
Si Duterte-Carpio, sa paghinabi sa 87.5 FM Disaster Radio, nagsulti nga ang mando girekomenda sa medical experts nga gikonsulta sa lokal nga kagamhanan human ang tibuok siyudad gipahimutang ubos sa community quarantine.
Dugang sa mayor nga mga doktor nagrekomenda sab sa pagsira sa maong mga establisemento aron nga makalikay ang katawhan nga mohimo og di importanteng biyahe kay gimandoan sila magpuyo sa balay aron nga kapugngan ang pagkuyanap sa kagaw.
“Bisan nag-ingon na ta nga mag-stay mo within your residence, you stay in your houses, you distance yourself from eath other, you frequently wash you hand with soap and water, naa gihapo’y manggawas aron manuroy. Karon ato na gyud siyang gisarado, by a law,” pung ni Duterte-Carpio sa interbiyu sa radyo.
Sa wala pa ang executive order, duna nay pipila ka mga malls ang nagpahibawo nga nanirado na sila tungod sa Covid outbreak.
Samtang kadtong mga patigayon nga wala mahisguti sa EO, ilabi na kadtong nagdeliber og batakang panginahanglan ug serbisyo, giawhag nga padayon nga mag-operate.
Nagmando sab si Duterte-Carpio niadtong Miyerkules, Marso 18, nga lugwayan ang liquor ban sa siyudad.
Matud sa mayor nga mga opisyal sa panglawas nagdiskarids na sa publiko nga moadto og mga pampublikong lugar bisan sa mga bars.
Bisan pa sa hinay-hinay nga pagpasira sa ubang establisemento, gipaneguro sa mayor nga nagbinantayon siya nga mag-imposar og total lockdown kay makamugna kini og dako nga economic impact sa tibuok siyudad.
“Kung mapansin ninyo, atong ginabuhat, dili nato ginadungan tanan. We do not want nga isarado ang tibuok Davao tungod sa economic impact niini,” tin-aw ni Duterte-Carpio.