GIHIMAKAK sa manager sa Flora Massage and
Spa nga si Emelita Orang nga aduna siyay kalabutan sa extra service sa ilang napulo ka mga babaying masahista.
Matod niya nga ang kasabutan sa customer ug sa masahista ilaha na ug wala silay bahin ang kompanya.
“Wala man koy labot anang sabot nila, sir, kay naa ra baya ko sa cashier, kanang ilang sabot nga extra service ilaha nana ambot nganong gidakop man ko,” matod ni Orang.
Natanggong si Orang sa selda sa Cebu City Police Office (CCPO) human gi onda ang ilang massage spa sa Banilad road, Barangay Kasambagan sa dakbayan sa Sugbo niadtong Miyerkules sa hapon, Marso 18.
Lakip sa nasikop ang tag-iya nga usa ka Korean national nga si Kim Jong Pyo, 44.
Matod ni Police Lieutenant Erlinda Mayam, hepe sa Women and Children Protection Center, aduna silay ebedensya nga ang mga masahista napugos sa paghimo sa extra service tungod sa mando sa management.
Ang napulo ka mga babaying masahista gipaubos na sila sa de briefing sa mga taga City Social Welfare Services sa Cebu City Hall. (AYB)