ONSE ka mga tawo nga dunay pending warrant of arrest sa nagkalainlaing mga kaso ang ningtahan sa City Mobile Force Company (CMFC) sa Cebu City Police Office (CPPO).
Usa sa mga nitahan ang pag umangkon ni Mayor Jonas Cortes sa dakbayan sa Mandaue nga usa ka traffic enforcer nga adunay warrant sa kasong frustrated murder sa dakbayan sa Mandaue nga si Lemuel Cortes.
Matod ni Police Lieutenant Colonel Randy Korret ang hepe sa CMFC nga nanawag nila ang kabanay ni Cortes aron mo surrender kini human masayod nga gihingusgan sa kapulisan ang kampanya batok sa most wanted persons sa tibuok Sugbo.
“Tinawag nalang sa amin na mag surrender nalang so inasis nalang namin, nag pasundo nalang sya at kaninang umaga nag bail na sya,” matod Korret.
Lakip sa mitahan ang doktor nga kanhi pangulo sa Parks and Playground sa Cebu City Hall nga adunay warrant of arrest tungod sa wala pag bayad niini sa contribution sa Social Security System (SSS) nga mao si Librado Macaraya.
Niadtong Martes, Marso 17, nitahan usab silang Ricardo Alin, Ed Posadas, James Pitogo nga pulos adunay kaso sa paghupot sa ilegal nga drugas, Alleda Opura sa kasong illegal gambling, Renan Tamayo, Erik Badayos, Ryan Manalili, John Mejares ug Michael Torrejos.
Dugang ni Korret nga aduna pay kapin sa usa ka libo ka mga wanted person sa tibuok rehiyon nga ilang gipangita nga adunay pending warrant of arrest.
Samtang, moabot usab sa 11 ka mga armas ang gitahan ngadto sa CMFC nga walay mga lisensya gikan sa bukirang barangay sa dakbayan sa Sugbo.
Gi pahimuslan ni Korret ang kahigayonan human nga halos tanan sa mga tawo namauli sa ilang panimalay tungod sa gipatuman nga community quarantine sa dakbayan sa Sugbo.
Ang mga sakop ni Korret milusad sa tulo ka adlaw nga minor combat operation sa mga bukirang barangay sa siyudad sa Sugbo.
Samtang, hugot nga mipatuman sa curfew ug checkpoint ang ubang unit sa Cebu City Police Office nunot sa gipatuman nga community quarantine. (AYB)