ANG Cebu City Health Office nipahibawo nga negatibo sa coronavirus disease (Covid-19) ang test result sa 27 anyos nga babayeng namatay sa miaging semana sa Dakbayan sa Sugbo.
Ang resulta nalakip sa bag-ong 15 gikan sa swabs nga napadala sa Research Institute for Tropical Medicine (RITM), nga nagnegatibo gikan sa Covid-19.
Sa usa ka press conference sa Marso 19, 2020, si City Health Officer Daisy Villa niingon ngaa ang CHO nakadawat sa mga resulta sa Miyerkules, Marso 18.
Ang CHO nakapada og 65 ka specimen ngadto sa RITM, 31 ini naka-examine ug ang tanan negatibo, dugang ni Villa.
Matod ni Villa nga nalakip sa bag-ong 15 nga naabot ang swab sample sa 27 anyos nga babayeng patient under investigation (PUI) nga namatay niadtong Marso 15.
Siya nagnegatibo sa Covid-19.
Ang pasyente namatay tungod sa grabeng pneumonia ug acute respiratory disease, matod ni Villa.
2 ka pasilidad
Ang Cebu City Government niila sa duha ka quarantine facilities sa siyudad, sa Cebu City Medical Center (CCMC) building ug Block 27 sa North Reclamation Area.
Matod ni Labella nga ang duha ka mga pasilidad makapapuyo og 300 ka mga tawo.
Matod ni Labella nga ang pasilidad sa North Reclamation Area gipaabot nga mahuman sud sa 10 ka mga adlaw, samtang ang pasilidad sa CCMC mahuman sud sa duha ka mga semana.
Bisan tuod siya naglaum nga ang sitwasyon di mograbe, apan ang Siyudad kinahanglan moandam ning mao nga mga pasilidad.
“We are not hoping that this will get worse, but just in case there will be more persons need to be quarantined, we have facility for them” matod ni Labella.
Si Villa niingon nga ang barangay health centers giandam usab aron ang mga pasyente nga mild lang ang simtomas sa Covid-19 maatiman sa mga sentro.
Matod niya nga mao ni ang paagi nga ang mga ospital di magdasok.