SUGOD kagahapon, Marso 19, temporaryo na nga gisirhan ang mga mall sa Dakbayan sa Sugbo subay sa mando ni Mayor Edgardo Labella nunot sa nagpadayong hulga sa coronavirus disease (Covid-19).
Giklaro ni Labella nga magpabiling abli ang grocery stores, supermarkets, money remittance centers, pharmacies, hardware stores, banko, ug ubang establisemento nga nitanyag og basic commodities.
Atol sa press conference kagahapon sa Huwebes sa buntag, gianunsiyo ni Labella nga temporaryong sirhan na usab ang mga spa, hair salon, barbershop, massage parlor, facial ug aesthetic clinic, internet cafe, gaming arcade, karaoke bar, ug sports center.
Lakip nga sirhan ang Cebu City Sports Center, country clubs, ug golf courses.
Kagahapon, gisirhan na ang tanang recreational centers sa dakbayan sama sa night clubs, bars, cocktail lounges, beer parlors, lakip na mga kalihukan nga adunay public viewing.
Samtang, gawas sa mga mall, gipasuspenso na usab sa mayor ang pagproseso sa mga lisensya ug permits sugod kagahapon hangtod sa malibkas ang general community quarantine nga gipatuman sa dakbayan.
Way lockdown
Kini maoy gipahibaw ni Gobernador Gwendolyn Garcia sa Marso 19, 2020 sa hapon taliwa sa gikahadlokan nga pagkatap sa Covid-19.
Gihimug-atan ni Garcia nga bisan pa sa sitwasyon sa Sugbo, way angay nga ika-ratol sa mga Sugboanon, ilabi na sa supply sa pagkaon.
Gipasabot sa gobernador nga ang pagpatuman og istrikto nga border control di buot pasabot nga wa nay tugutan nga makasulod o makagawas.
“Ang atong gidid-an pagsulod ang mga tawo nga naggikan sa laing dapit, apan ang mga supply libre nga makasulod sa ato. Libre usab ang makagawas. Wala’y angay kahadlokan nga mahutdan ang atong mga supermarkets, pharmacies ug ubang tindahan sa pang adlaw adlaw nga panginahanglan”, matod ni Garcia.
Sa Marso 14, 2020 giluwatan ni Garcia ang Executive Order (EO) No. 5-F labot sa pagdili sa pag pasulod sa mga pasahero og barko nga gikan sa lain nga mga lugar gawas sa Sugbo.
Sa panahon sa krisis, matod ni Garcia nga angay nga magtinabangay, mokalma ug mo-tuman sa mando sa pangagamhanan aron malikayan ang pag katap sa sakit.
“Buhata ang inyong tampo aron kining atong giatubang karon atong mahatagan og kasulbaran. Ayaw pagpuno sa suliran pinaagi sa pagdagan ngadto sa mga supermarkets, sa mga pharmacies ug hutdon nalang ang mga supplies. There is no need to panic buying, there is no need for hoarding,” matod ni Garcia.
Sa Huwebes sa hapon, nipahigayon og hiniusang pulong sila si Mayor Edgardo Labella sa dakbayan sa Sugbo, Mayor Junard Chan sa Lapu-Lapu, Mayor Jonas Cortes sa Mandaue, Talisay City Mayor Gerald Anthony Gullas Jr. ug Office of the Presidential Assistant to the Visayas (Opav) Secretary Michael Dino kauban si Garcia.
Bisan na-confine
Bisan naa sa usa ka tambalanan sa Dakbayan sa Mandaue ang unang pasyenteng positibo sa Covid-19, di gihapon mopatuman si Mandaue City Mayor Jonas Cortes og lockdown.
Sigon niya nga magdepende kini sa ilang meeting sa Huwebes sa hapon.
Apan iyang giklaro nga wa pa siya modeklarar og community quarantine.
Dugang niya nga kinahanglan nga adunay hiniusang lakang batok sa COVID-19 kalabot sa tanang local government units (LGUs) lakip na ang Probinsya sa Sugbo.
“We need to have a unified action here in the province of Cebu. Our executive orders are in line except for the curfew which Cebu City is earlier,” sigon ni Cortes.
Gipahingusgan na ni Cortes ang iyang executive order nga kinahanglan sundon na kini sa publiko labi na ang social distancing, curfew ug sayo nga pagpanera sa mga establisemento.
“There is a need to control the people’s movement para ma-prevent nato ang transmission sa maong virus. Kon wala tay buhaton sa gawas, magpuyo na lang ta sa ato,” sigon ni Cortes.
Giawhag sab niya nga matag balay, kon kinahanglan kini mopalit sa gawas sama sa pagkaon o mga tambal, usa lang ka tawo matag balay ug kinahanglan nga himsog.
Di sab magdumili pagpasaka og kaso si Cortes ngadto sa mga indibidwal nga magpakatap og fake news.
Aduna say ipagawas nga memorandum si Cortes alang sa ports ug coastal area sa Mandaue kon diin gidili na ang makasulod nga mga pasahero pwera nalang kon essential goods. (JJL, ANV, KFD, KST)