“DILI ba kuyaw ang Mindanao?”
Mao ni ang unang pangutana nga akong nadungog gikan sa akong mga higala dihang ilang nahibaw-an nga molaag ko sa Central Mindanao o Soccsksargen (Region 12).
Sama sa Luzon ug Visayas, daghang gitago nga bahandi ang Mindanao nga nagpaabot lang ma-explore.
Apan tungod sa nanggawas nga mga balita sama sa terorismo, kidnapping ug uban pa natabunan na ang maong isla og bati nga reputasyon.
Ang Department of Tourism Region 12 nilusad og promotional drive nga “Sox is next” sa miaging tuig sa tumong nga maila ang Soccsksargen isip top tourist destination.
Sox o Soccsksargen region gilangkuban sa mga probinsiya sa Cotabato, South Cotabato, Sultan Kudarat ug Sarangani ug sa mga syudad sa Kidapawan, Tacurong, Koronadal, ug General Santos.
Turismo, dili terorismo
Kon akoy pangutan-on kon luwas ba nga bisitahon ang Sox? Akong namatikdan nga sukwahi kini sa atong nadunggan o nakita sa telebisyon.
Nakatampo sa kalinaw sa Mindanao mao ang presensya sa militar sa matag checkpoint.
Andam usab ang mga local government unit nga motabang sa mga turista paghikay sa ilang tour.
Kultura, adventure ug natural attraction. Kining tanan masinati sa Soccsksargen.
Nindot bisitahon
1. Mosque sa Cotabato City. Gipasidunggan isip safest place sa Region 12 ang Cotabato City sa regional police office niadtong 2017 human nakitaan og pag-ubos sa crime volume og 47 porsento. Anaa nahimutang sa Cotabato City ang kinadak-an nga mosque sa Pilipinas, ang Sultan Haji Hassanal Bolkiah o Grand Mosque nga susama nga anaa ka sa Abu Dhabi, United Arab Emirates.
Kini usab ang ikaduhang labing dako nga mosque sa Southeast Asia sunod sa Istiqlal Mosque sa Indonesia.
Aduna kiniy kapasidad nga 15,000 ka tawo bisag kinsa mamahimong makasulod sa Grand Mosque basta mosunod lang sa house rule.
Gikinahanglan usab nga magsul-ob og hijab ang buot mosulod sa mosque, gidili ang pagsaba-saba ug dili pasudlan kon adunay pangadye ang mga Muslim.
Alang sa mga turista, adunay hijab nga paabangan gawas sa mosque.
2. Tuna sa General Santos City. Naila ang GenSan isip tuna capital of the Philippines diin nagkadaiyang klase sa tuna makit-an sa GenSan. Moabot sa 45 ka kilos pataas ang gibug-aton matag tuna.
Ang fish port abli alang sa mga turista apan gikinahanglan nga mosunod sa striktong dress code. Dili makasulod kon walay mapakitang government-issued valid ID sa gate pa lang. Gidili usab ang pagsul-ob og short, tsinelas, sando o sleeveless. Gikinahanglan usab nga magsul-ob og boots aduna hinuoy paabangan nga boots sulod sa port.
Giawhag sa local tourism sa GenSan ang mga turista nga mobisita sa fish port 5:00 am hangtud 6:00 am.
3. Asik-asik Falls sa North Cotabato. Dili ilado nga tourist destination ang North Cotabato gawas nga layo kini, mingaw sab ang lugar. Usa ka bahandi nga anaa sa lungsod sa Alamada ang labing matahom nga Asik-Asik falls.
Gitawag kini og asik sa Hiligaynon buot pasabot bisbis, sama nga usa ka kurtina ang 200-meters nga busay. Gikinahanglan pang mag trek og dili molapas usa ka oras, best time nga mobisita sa Asik-asik 6:00 am aron imong ma-solo ang lugar.
4. White sand beach sa Sarangani. Gitawag nga Boracay of Mindanao ang Barangay Gumasa sa Glan, Sarangani tungod puti ug pino nga balas ug tin-aw nga dagat niini. Lahi sa Boracay, unspoiled ug dili crowded ang dagat sa Glan.
Unsaon pag-adto
Adunay daghang paagi aron makaadto sa Soccsksargen kay direct flight ang mga local airline gikan sa Sugbo padulong sa Cotabato City ug General Santos City.