Kyaw-Kyaw: Bawal gahig ulo, di magbuotbuot
KAHASOL gyud tinuod ang atong nasinati ning nanglabayng mga adlaw sukad gipakanaug ang mga kamanduan nga ang tuyo mao nga mabatukan ang pagkaylap ug pagtakudtakud sa corona virus.
Kalit lang nausab ang dagan sa atong mga kinabuhi. Syempre, kon may kausaban, duna gyuy mga reklamo.
Ang ato lang hunahunaon nga kining tanang kausaban gitumong sa kaayohan sa tanan. Di lang ta magpabilib, magpagahigahi sa ulo, magdumili pagsabot, magbuotbuot.
Magsakripisyo lang ta uban sa panghinaut nga matsugi ra kining maong virus. Pero syempre, gikinahanglan ang atong pagsabot ug pagtinabangay.
Labaw sa tanan, gikinahanglan ang atong pagsalig sa Labawng Makagagahum. Mao nga di kita magduhaduha pagtawag Kaniya ug paghangyo sa iyang bendisyon ug kalooy.
•••
Gikan sa pagka Promo Diva sa mga sine ug artista sa Star Cinema, si Josie Pereyra gitudlo nga distributor ni Baby S. King, ang bosing sa JFK Essentials. Mga perfume, cologne, shower cream ug gel, lotion, cosmetics, serums, linen spray ug uban pa ang mga produkto sa JFK Essentials.
Bana ni Baby si JFK (John Francis King) ug kini mismo ang numero unong kritiko sa ilang mga produkto nga alang sa babaye, lalaki ug mga bata.
•••
Ang lungsod sa Ginatilan nagsaulog sa pista ni San Gregorio Magno niadtong Dominggo ug Lunes. Napagan ang mga pasundayag unta sa Missing Filemon, ni Jay-R Siaboc ug ang Ms. Ginatilan 2020.
Tungod kay nakontrata na man ang sound system, gipatugtog na lang kini kada gabii aron di mahimong morag pasiunang pagsaulog sa Semana Santa.
•••
Napagan usab ang pasundayag sa mga sakop sa Il Signore Theater Company 2021 sa Mga Dula Sa Pagtoo sa parokya sa Inmaculada Concepcion sa Oslob niadtong Miyerkules, Mar. 18.
Niadtong Biyernes, nagpa-presscon ang grupo alang sa umaabot nga dula sa tablado nga Melchizedeck nga sa Abril unta ipasundayag. Si Suzette Ranillo ug Bayang Barios ra ba ang mga bida uban nila ni Ligaya Rabago, Arnel Pahang, Clint Solante ug Eldren Padigos ubos sa direksyon ni Msgr. Ting Ancajas (ang tagsulat).
Kon mabalik na sa normal ang sitwasyon ug molayat na sa planetang Mars o Venus ang virus, idayon ang pasundayag, lagmit sa Mayo.