TUNGOD sa community quarantine nga gipatuman sa gobyerno daghan karon ang anaa na lang sa ilang mga panimalay magtrabaho.
Bisan si Health Secretary Francisco Duque III tua na lang sa ilang balay magtrabaho. Nag-self-quarantine siya human usa ka opisyal sa iyang departamento nagpositibo sa COVID 19.
Pero usa ka trabahante gikasab-an sa asawa kay gidala ang iyang trabaho sa balay. Tubag niya, “Unsaon nga mao ma ni ang giawhag sa gobyerno.” Matod pas asawa, “Ok ra na sa uban. Pero ikaw, embalmer ka. Gidala pa gyud nimo ang minatay diri sa balay.”
•••
Nikusog usab ang panginahanglan sa internet kay daghan ang naa sa balay magtrabaho. Kusog sab ang halin sa mga pocket wifi ug prepaid home wifi niadtong way linya.
Apan maglisod na sila karon pagpamalit niini kay gipasirad-an ni Cebu City Mayor Edgardo Labella ang mga mall sa syudad. Lakip sa gipasirad-an mao ang mga entertainment establishments, gyms, restaurants ug sports centers.
Duha ang tuyo niuning pagsirado sa mga establishments ug pag-awhag sa social distancing - mitigation ug suppression.
•••
Daghan karon ang nitanyag og tambal sa coronavirus. Pasidaan sa nga health experts nga wa pay tambal o medisina batok niini.
Busa di angay nga magpataka sa pagpalit sa bisan unsang mga tambal nga gitanyag aron di takboyan sa corona virus. Hinuon way problema kadtong mga vitamin supplements.
Diha pay na-viral nga saging ray katapat sa corona virus. Kadtong nangaon og daghang saging namalit na karon og kapayas kay gipangtubol.