POSIBLENG modeklarar og community quarantine ang lalawigan sa Misamis Oriental human tanan nga mga lideres sa lalawigan uyon niini nga maoy gipangayoan ni Governor Bambi Emano og abiso atol sa Misamis Oriental coordination meeting.
Matud ni Emano nga kinahanglan gyod niya nga mosango sa tanan lideres ug paagi kini aron mahunong gyod ang transmisyon sa coronavirus disease (Covid 19).
Atol sa Misamis Oriental coordination meeting nga gilangkoban sa presidente sa liga ng mga mayor, vice mayor, barangay kapitan, Sangguniang Kabataan, Department of the Interior and Local Government, ug uban pang ahensya sa lalawigan nauyunan ang community quarantine.
Matud ni Bambi nga kanunay nga gihangyo ni Provincial Health Officer Dr. Jerie Calingasan nga magpaubos na ang lalawigan og community quarantine apan daghan ang iyang gikonsidera. Usa niini kining igong suplay nga mahatag sa katawhan sa lalawigan sama sa pagkaon ug uban nga mga protocols.
Buot niini kung modeklarar ang lalawigan, ready na ang tanan ug di magkaguliyang.
Matud ni Bambi nga health safety sa katawhan ang iyang labing prayoridad.
Sa pagsulat ning balita, makigkita pa kini sa uban nga mga lideres aron hingpit nga mahatagan og katumanan kung kini mapatuman ba sa hingpit.