P1.3M balor sa shabu nasakmit sa Mandaue

Mapa sa Dakbayan sa Mandaue. (Google Maps)
Mapa sa Dakbayan sa Mandaue. (Google Maps)

BISAN pa sa hulga sa coronavirus disease (Covid-19), padayon gihapon ang pagpamaligya og ginadili nga drugas sa usa ka lalaki, diin nakuhaan siya og P1.3 milyones sa gituohang shabu, atol sa gipahigayong buy-bust operation sa Opao Police Station sa Sitio Superior, Barangay Looc, Mandaue City alas 9:35 sa gabii adlawng Huwebes, Marso 19, 2020.

Giila ang maong durugista nga si Junie Lopez Bongo, 25, taga Barangay Subangdaku, Mandaue City.

Gipangulohan ni Police Major Aldrin Villacampa, hepe sa Opao Police Station, ang maong buy-bust operation.

Sigon ni Villacampa nga anaa na si Bongo sa ilang watchlist sukad 2017 ug kada pahigayon nila og operation niini permi kining makaikyas.

"Idlas kaayo ni siya unya karon ra ni namo nadakpan," sigon ni Villacampa.

Nakuha gikan ni Bongo ang 200 ka gramo sa gituohang shabu nga nagbalor og P1,360,000.

Pasakaan og kasong kalapasan sa Republic Act 9165 o ang Comprehensive Dangerous Drugs Act of 2002 ang maong suspek. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph