MIPAHIGAYON og disinfection operation ang Covid-19 Task Force sa Dakbayan sa Talisay sa traysikol terminal nga nahimutang diha sa Tabunok, Dakbayan sa Talisay Biyernes sa buntag, Marso 20, 2020.
Si Talisay City Mayor Gerald Anthony “SamSam” Gullas Jr. mimando sa task force sa pagpahigayon og misting ug disinfection operation sa tanang traysikol diha sa Tabunok Market ug sa merkado mismo.
Pasado alas 11, gisugdan sa duha ka grupo ang maong operasyon diin nahuman sila pasado alas 2 sa hapon.
Nasayran nga adunay lima ka disinfection machine nga gigamit aron hingpit nga malimpyohan ang matag traysikol nga anaa magparking sa terminal.
Gikatakda sab nga mopahigayon ug disinfection sa tibuok City Hall Sabado samtang isunod sab niini lukop Public Market atol sa curfew time.
Moabot sa 300 ka mga traysikol ang napaubos sa disinfection sa Covid-19 Task Force. (PR)