Obenieta: Pakgang sa kugang

DILI kinahanglan nga kalit kang hasmagan ka’g wakwak aron ka makurat. Igo nang mosugwak ang kabugnaw sa imong kaugatan kon naigking ka niining kasayuran nga makahilanat:

Bisan pa’g ang ilang pahak nitapak na sa ilang hubon, naa’y mga batan-on nga bagis na kaayong makigtupong ug makigpakong sa balaod.

Gikan didto sa dakbayan sa Lapu-Lapu, gikataho nga diha’y hugpong sa mga menor de edad nga nalambigit sa pagpanglugos ug pagpatay. Ila kunong gibahog-bahog ang lawas sa usa ka dalagita, ug ang iyang uyab ila kunong gibuno. Pulos kuno mga sakop sa usa ka “gang” ang mga nalambigit ining hitaboa.

Bisan lisod tuhoan nga dili lang ang mga kunot og agtang mao’y sungayan, sayon ra pod kaayo ang pagtagawtaw kon nganong nahimugso ang suliran sama ini. Apan kinahanglan tang molihok lahos sa pagbasol sa kakulian sa kabanayan, tunghaan, simbahan, ug uban pang duna unta’y gahom ug kaakohan sa pag-umol sa kinaiya sa atong kabatan-onan.

Lakip sa pagtulon ning parat nga kamatuoran kabahin sa pagtagad ug pag-amuma nga lagmit wala mahingpit pagbuhat sa katilingban, labing mahinungdanon ang pagpangita’g paagi nga mausab kining matang sa kapintas gikan sa mga batan-on nga nangita’g lingaw pinaagi sa pagtugaw sa kahapsay ug kalinaw.

Nahibal-an nga ang kabarangayan sa Carreta, Sambag, Guadalupe, Pardo, Tejero, Labangon ug Panganiban lakip sa nahulga sa kaguliyang gikan anang mga “gang.” Ug aron sila mapakgang ug ang lain pang kasamok, dili igo nga gukoron ang sakop sa mga batan-ong hugpong sumala sa laraw sa kapulisan.  Labing maayo kon dili kang kutob sa tulomanon sa Anti-Street Hoodlums Team gikan sa Cebu City Police Office (CCPO) ang pag-atiman ining suliran sa saag nga kabatan-onan.

Kinahanglan pud nga tagaan og pagtagad ang gidak-on sa “socio-economic” nga mga hinungdan nga gaalirong sa suliran kabahin sa “gang violence.”

Diri sa America diin gihilam-os ra kining mga dugoong kisaw sa kabatan-onan, duna’y mga tulomanon nga gipasiugda sama sa Open Door Youth Gang Alternatives didto sa Denver, Colorado.  Sigon pa sa ilang website, “Open Door is now seriously focused on prevention by providing alternative choices, understanding opportunities, and presenting new realities for a healthier lifestyle for urban youth.”

Kining maong kalihokan sa Open Door galangkob pod sa hiniusang paningkamot sa katilingban gawas sa mga tunghaan ug kapulisan. Nakig-alayon pod ini ang ang ubang mga business corporations, non-profit agencies, ug civic groups. Niining paagiha ilang gipakaylap ang kasayoran ug pagtuon sa mga pamaagi kabahin sa pagpugong, pagpanginlabot, ug pag-atiman sa sakop sa mga banay nga nagpasanay sa malapason nga “youth subcultures.”

Pinaagi sa Open Door, napahigayon alang sa mga batan-on ug sa ubang sakop sa ilang banay kining mosunod nga mga tulomanon: Professional Development, Academic and Character Education Program, Parent Connection, Intensive Intervention and Redirection Program (IIR), ug Youth Outreach Unit.

Hinaot suwayan pod unta sa mga hingtungdan sa Sugbo kining sanglitanan gikan sa Open Door.

(geemyko@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph