NAG double time na ang mga siyentista pagpangita og vaccine para pagbatok sa Corona virus nga mikatap sa tibuok kalibutan. Padayon ang pagsaka ug misamot na ka daghan ang nanghatakdan niini.

Matod sa mga eksperto dapat mag-doble og bantay og palayo sa virus ang mga edaran (50 anyos pataas), mabdos og kadtong naa nay daang gipamati, co-morbid o medical nga kondisyon sama sa masakiton og kasing-kasing, diabetic, dunay sakit sab aga, cancer o luya og resistensiya.

Ang atong Nasudnon Pangagamhanan nagpakatap na og mga impormasyn aron kita mas makasabot unya maka-likay ining sakita.

Ang pinaka una og pinaka maayong buhaton sa pagkakaron mao ang pagpalayo o paglikay sa mga pundok-pundok o lugar nga daghang magpundok kon social distancing.

Pasabot, ayaw una ilahos ang planong pagbiyahi labi na kung di kini importante . I-irog una ang mga tambungan nga mga pulong-pulong o appointments nga daan ng nakahilira.

Likayi una ang pagkaon sa gawas, tan-aw og sine og suroy-suroy. Hinumdumi, likayi usa ang pag beso-beso, lamano o halok kay kusog kaayo kining motakod labi na kung ang kagaw nga naa sa kamot maoy ihikap sa baba , ilong o mata.

Kung makig-estorya, distansiya-i mga 1 ka metro para di moabot ang pinisik (droplets) nga laway, plema o sip-on sa ka kukabildo. Kini nga droplets magpabiling buhi sulod sa 8-24 oras maong likayan una pag-adto sa mga lugar nga daghan og tawo ug ospital nga daghan og masakiton.

Rekomendado sab ang kanunay nga paghugas sa kamot gamit ang sabon, paggamit og alcohol o disinfectant nga mga wipes o gel. Ang pagsuot ini makatabang sab aron ang kagaw sa kamot di mapahid sa mata, baba o ilong.

Sa telepono o internet lang usa pakig estorya.

Stay healthy, saktong katulog, ehersisyo, kaon og masustansiyadong pagkaon (utanon o prutas), inum og daghang tubig ug vitamins para motaas ang resistensiya.

Katapusan, kalma lang og iduko sa pag-ampo ang mga panghitabo kay ang Diyos ray nasayod sa tanan.