GIBUTYAG ni Avigael Maningo-Ratcliffe, junior manager sa corporate communication sa GMR Megawide Cebu Airport Corporation (GMCAC) nga wa nay mga langyaw nga mga pasahero nga nagpabilin sa Mactan Cebu International Aiport (MCIA) Terminal 1.
Ang maong terminal mao ang tugpahanan sa domestic flights.
Kini human nga gipasakay na sila sa duha ka sweeper flights nga gipasiugdahan sa Philippine Airlines (PAL) ug Department of Tourism DOT-7 niadtong Huwebes, Marso 19, 2020.
Ang naasoyng flights maoy mihatod sa mga langyaw nga nangatanggong sa Sugbo, apan ganahan mopauli sa ilang nasod agi sa Ninoy Aquino International Airport (NAIA) sa kaulohan.
Huwebes sa alas 9:15 sa gabii Marso 19, moabot sa 134 ka mga langyaw nga pasahero ang gihatod sa flight sa PAL paingon sa kaulohan samtang laing 240 ka mga pasahero ang gihatod usab nianang pagka hapon pa lang.
Ang wa makasakay sa duha ka sweeper flights giingong nanguli ra usab pagbalik sa ilang mga hotel.
Ang gisiguro pagpasakay mao lang kadtong sigurong adunay return plane ticket pabalik sa ilang mga nasod sulod sa 24 oras.
“Wala pay advisory, wala pa mi nadawat sa uban nga airlines kon mag mount ba og dugang sweeper flights in the coming days. Mag post lang unya mi og advisory,” matod ni Maningo-Ratcliffe sa interview sa Superbalita Cebu.
Samtang gibutyag ni Maningo-Ratcliffe nga gawas sa sweeper flights niadtong Huwebes, Marso 19, wala na gayuy flight operation ang Terminal 1 sukad nga gipaubos sa enhanced community quarantine ang Luzon ug general community quarantine ang Sugbo.
Apan aduna gihapoy mga skeletal force nga gipahimutang sa tugpahanan aron mo assist sa posibleng adunay mga walk-in nga planong mobiyahe.
Ang Terminal 2 nga maoy tugpahanan sa international flights normal ra ang operasyon.
Alkanse
Gumikan niini, giangkon ni Maningo-Ratcliffe nga nasinati na usab nila ang alkanse sa operasyon sa tugpahanan.
Di pa hinuon siya makabutyag kon pila ang ilang alkanse sa pagkakaron.
Ang uban nga mga empleyado giingong gipa-obserbar na sa work at home o leave hilabi na kadtong adunay mga pending medical condition sama sa nagsabak.
Apan way labot niini ang anaa sa field ug operation sa tugpahanan.
“Naa man gyud siyay effect, naa man gyud siyay impact gyud pero dili ra pud sa amoa, tanan man gyud ni affected kay kuan man gud ni siya domino effect ba. Dili lang kami kundi tanan gyud,” matod ni Maningo-Ratcliffe.
Ang mga langyaw ug kadtong mga Pinoy nga gikan sa mga nasod nga dunay kaso sa Covid-19 ipaubos sa 14 ka adlaw nga quarantine.
Hayan wa na say mga langyaw nga makatugpa sa umaabot nga mga adlaw kay di na pasudlan ang Pilipinas sunod semana og mga langyaw. (GCM)