Gwen: kon way trabaho, ayaw og laag

PAGKASIPAT. Si Cebu Governor Gwendolyn Garcia mipakita sa mga hulagway sa mga tawo nga nag-party ug nagtapok bisan sa gipatuman nga quarantine sa Sugbo. Ang ilang gibuhat gikasuko ni Garcia taliwa sa hulga sa coronavirus disease (COVID-19), (Arvie N. Veloso)
PAGKASIPAT. Si Cebu Governor Gwendolyn Garcia mipakita sa mga hulagway sa mga tawo nga nag-party ug nagtapok bisan sa gipatuman nga quarantine sa Sugbo. Ang ilang gibuhat gikasuko ni Garcia taliwa sa hulga sa coronavirus disease (COVID-19), (Arvie N. Veloso)

ALANG sa mga Sugboanon nga may importanteng trabaho, gipahibaw ni Gobernador Gwendolyn Garcia nga magpadayon ang trabaho sa mga empleyado.

Gitan-aw kini ni Garcia nga usa sa labing importante nga buhaton taliwa sa krisis nga giatubang sa nasud ug hulga sa coronavirus disease (Covid-19) sa Sugbo.

Kini tungod aron may ikapalit gihapon ang mga Sugboanon sa mga gikinahanglan niini matag adlaw.

“If importante ang trabaho, mogawas mo aron naa moy ika-pamalit og necessities. Kon wa nay ipalit, kanang panday mga construction worker unya kon di makakuha sa sweldo matag semana o adlaw, way ikapalit,” matod ni Garcia sa Marso 20, 2020.

Hinungdan nga subling gipahinumdoman ni Garcia nga magpabilin sa balay ug dili mogawas kon way importante nga buhaton.

Alang sa mga naglaom og lockdown, matod ni Garcia nga di kini maoy option sa mga lider sa Sugbo ug naa usa’y mga protocol nga angay nga tumanon una mo-patuman og lockdown.

Gipasabot ni Garcia nga subay sa kamandoan nga giluwatan sa Malacañang sa Marso 12, 2020, kinahanglan nga may duha ka mga kaso nga matala ang syudad, lungsod o barangay una mopatuman sa lockdown.

Dugang niya nga kinahanglan usab nga pangandaman una kini sa pangagamhanan ilabi na sa lokal ug mga indibidwal.

“Sa panahon nga gikinahanglan nga motawag ko og lockdown. Kinahanglan nga preparado ta, kinahanglan ang local government units andam motubag pag-abot sa gutom. Unsaon man unya kon madesperado na ang tawo. Gubot. Inig gubot, kanang mga nagkomento maka tabang ba na? Kinahanglan calibrated ang atong mga steps”, matod ni Garcia.

Hotel Quarantine

Bisan pa man sa hulga sa Covid-19, nagpadayon ang pagsulod sa mga flight gikan sa lain nga nasud sama sa laing bahin sa South Korea, Japan, Singapore, Thailand ug Middle East.

Apan gipahibawo ni Garcia nga kinahanglan nga mopaubos sa 14 ka adlaw nga quarantine ang mga pasahero isip katumanan sa mando sa pangagamhanan sa lalawigan sa Sugbo.

Tungod niini, may siyam ka mga hotel ang mibukas sa ilang pultahan aron mahimong quarantine facility sa mga langyaw.

Base sa datos sa Provincial Tourism Office (PTO), may 24 ka mga pasahero na ang anaa sa mga hotels. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph