SUGOD karong, Marso 22, 2020 alas 3 sa hapon, di na makagawas 24 oras o tibuok adlaw ang mga estudyante ug senior citizens ilabi na ang nag pangidaron og 65 anyos pataas.
Ang dunay importante nga mga lakaw sama sa mga nag trabaho, kinahanglan nga magdala og identification (ID) card, residence certificate o work certification.
Kini pagpamatuod nga may tuyo ang paggawas sa panimay.
Kini maoy kamandoan ni Gobernador Gwendolyn Garcia nga ipaagi sa usa ka executive order (EO) nga palig-onun pinaagi sa usa ka ordinansa nga gikatakda nga ipasar sa Hunta Probinsyal sa Lunes, Marso 23, 2020.
Ang kapulisan ug militar maoy gitahasan sa pagpanakop ug pagsita sa mga mosupak sa mando.
“Except those who need to go to a medical facility aron sa pagpatambal o kaha sa pag-avail og regular medical services”, matod ni Garcia sa mga tigbalita sa Marso 21, 2020.
Gawas niini, gidili na ang pagpahigayon og liga, tigbakay ug tari.
“Dili na tugotan ang pagpatagbo og daghan taw aron mo mag duwa-duwa. Kon duna man gani report gikan sa bisan kinsa, hinumdumi, lakip na ang kapitan niini nga manubag”, asoy ni Garcia.
Ang mosupak sa maong mando, dakpon ug ipaubos sa usa ka seminar. Laing kamandoan usab ang luwatan ni Garcia labot sa protocol nga sundon sa mga tindahan sa presyo sa mga baligya nga labing gikinahanglan sa mga tawo.
Kini sama sa bugas, de lata, cooking oil, alcohol ug uban pa.
“Sayod na kita nga duna na kitay price ceiling sa mga basic necessities but we will go further. They will be required to adhere to the specific number of bottles or specific number of cans, kilos duna tay gibutang nga kinahanglan ilang sundon”,matod ni Garcia.
Apan tungod kay daghan gihapon nga tindahang wa mosunod, mopahamtang na og penalty o ba kaha ang pag revoke sa mga business permit niini.
Ang tanan nga kamandoan kinahanglan nga sundon ug subayon sa tanan nga mga opsiyal sa lokal nga kagamhanan, kon di manubag sila sa nahimong salaod sa ilang konstituente.
Gihimo nga pananglitan ni Garcia nga misupak sa mando mao ang kapitan sa Brgy. Kabatbatan, lungsud sa Dumanjog nga si Ruel Cuevas.
Si Cuevas nadakpan sa raid sa kapulisan kay nagpatigbakay sa iyang birthday (estorya sa pahina 3).
Presyo
Tungod sa giingon nga pag patong og presyo sa basic commodities sa pipila ka mga tindahan sa lalawigan sa Sugbo, usa ka Executive Order (EO) No. 11 Series of 2020 ang giluwatan ni Gobernador Gwendolyn Garcia pag umol ug Price Control Task Force sa lalawigan.
Ang task force maoy mo-inspection sa mga tindahan ug ubang retailers sa lalawigan kon mi-tuman ba kini sa gi-pagawas nga price ceiling sa basic commodities nga gipahimutang sa Cebu Provincial Price Coordinating Council (CPPCC).
Nalakip sa grupo ang Department of Agriculture (DA), Department of Energy (DOE), National Food Authority (NFA), Sugar Regulatory Administration (SRA), Food and Drug Administration (FDA), Provincial Social Welfare and Development (PSWD), Cebu Chamber of Commerce and Industry (CCCI), Mandaue Chamber of Commerce and Industry (MCCI), Philippine Retailers Association (PRA) ug Cebu Provincial Prosecutor (CPP).
Ang task force pangulohan sa Department of Trade and Industry (DTI).
Atol sa pakighinabi sa mga tigbalita sa Marso 20, 2020 usa ka bagsakan center ang buksan sa Lalawigan alang sa mga labing nagkinahanglan ilabi na ang mga displaced employees.
Posible nga ipamutang kini sa mga municipal o barangay gyms aron mas hamugaway ug makapatuman sa social distancing.
Social Distancing
Human nga adunay 57 ka mga driver sa pampublikong sakyanan sa Metro Cebu ang nadakpan sa Land Transportation Franchising and Regulatory Board 7 tungod kay wa motuman sa social distancing, ang kapulisan sa siyudad sa Sugbo padayon sa ilang pagpahimangno sa mga motorista nga ipatuman ang social distancing.
Matod ni Police Colonel Hector Grijaldo, bag-ong milingkod nga hepe sa kapulisan sa siyudad sa Sugbo, nga sukad siya milibot sa checkpoint niadtong Biernes sa gabii, Marso 20, daghan sa drivers ang wa moobserbar niini.
Iyang gipasabot nga dako kaayo og ikatabang nga di makakatap ang Covid-19 tungod kay ang maong matang sa virus makuha pinaagi sa panagdikit sa mga tawo.
Nahimo kining epektibo sa China diin ang mga tawo hugot nga gidid-an sa ilang gobyerno nga makaduol sa matag usa kanila nga maoy hinungdan nga wa nay natakdan sa Covid 19 bisan didto kini nagsugod.
Tungod niini, magpapilit silag posters sa sulod sa mga sakyanan nga adunay pahibawo nga “Distancia Amigo” nga nagpasabot nga gidili ang pagdikitdikit sa ilang pagsakay ug labing maayo nga tumanon ang pahimangno nga social distancing.
“Common to na makikita nyo sa mga mud guard nga mga sasakyan ang distancia amigo. So, medyo catchy siya, madali siyang ma recall ng mga Cebuano kay binisaya man ni siya. It is a awareness to the public that it is very important that social distancing is to be observed,” matod ni Grijaldo.
Gipahimangnoan lang una niya ang mga driver nga nagmaneho sa rutang Colon-Talamban diin nakita niya nga puno kini sa pasahero. (ANV, AYB)