NAGSIGI kog monitor karon sa daghang mga reklamo tungod sa nagkanihit nga tubig gikan sa Metro Cebu Water District (MCWD) samtang ang ubang mga opisyal labi na sa panglawas nagsigig awhag nga maligo inig abot sa balay ug sa pagsigig panghunaw.
Unsaon pagkaligo ug pagpanghunaw kon walay agas ang mga gripo sa MCWD? Kamahal baya sa pasi-aw sa akong amiga sa Facebook nga mineral o bottled water na lang kuno ang ipangkaligo ug ipanghunaw kon mahutdan sa gisawod sa kaadlawon.
Swerte ang mga nagsalig og atabay, mga artesian well, ug kining private deep wells. Apan kasagaran sa atong mga kaigsuonan nagsalig intawon sa tubig gikan sa MCWD.
Sa Facebook, nagsigi ko og monitor sa mga reklamo gikan sa Lilo-an, sa Punta Engaño sa Syudad sa Lapu-Lapu, Talamban ug Guadalupe.
Alang sa mga apektado, naa koy nakit-ang public Facebook Group nga “MCWD Complaints Forum.” Moawhag ko sa kadagkuan sa MCWD – lakip na ang ilang bag-ong Board, ang management, ug ang MCWD Union – sa pag-monitor niini.
Alang sa atong katawhan sa Metro Cebu, it is a matter of life and death. Panagang baya nato ang pagkaligo ug panghunaw batok sa coronavirus disease 2019.
Nahinabi baya namo ni Ely Baquero ug Kim Aviles si MCWD chairman Joey Daluz ug siya niingon nga dunay i-deploy nila nga mga trak sa MCWD nga mohatod og tubig sa mga komunidad nga walay tubig.
Alang kanako nga naghinuktok kabahin niini karon, nagkinahanglan kini og tabang sab sa mga barangay aron pagsiguro sa social distancing. Basin og sikit ra unya ang linya o mag-ilog gyud inig abot sa mga trak.
Apan diin man kini gikan nga tubig? Duna ba kitay bag-ong tinubdan?
Niingon si MCWD Chairman Daluz nga mogahin silag kantidad aron pagbuhat og 40 ka mga deep well sa ilang jurisdiction?
Hmmm. Apan mahuman kini mga 2-3 months pa kuno. Busa dili kini makatabang sa atong krisis karon mga emergency gyud. Maligo ug manghunaw na lang kita og mineral water o alcohol.
Atong gipangutana si Joey niini. Ang anak sa akong bayani nga si Inday Nita niingon nga “we have to bite the bullet.”
Makasabot ako kaniya apan dili kita angayang mosurender dayon. Naay daghang mga paagi, Bay.
Pananglitan, naa may mga water supplier nga sama sa Abejo ug kining Mactan Rock nga makahatag dayon og dugang tubig. Hatag or at a very minimum price kay emergency baya.
Atong awhagon sila nga mohatag og tubig.
Nah, mahimo kitang mag-fasting labi na karong Semana Santa. Mahimo sab kitang mopalit pa og dugang mineral water. Apan unsa na lang ang atong pang-sanitation batok sa COVID 19?
Mas maayong molihok dayon ang MCWD. (@anol_cebu sa Twitter)