Nalzaro: Nganong way lockdown sa UK?

SAMTANG nagkaguliyang ug nagkamulo og panagang ang kadaghanang kanasuran aron dili grabeng mokatap ang gikalisangang coronavirus disease (Covid 19) sa ilang tagsa-tagsa ka mga nasud, ang United Kingdom (UK) o Great Britain morag wala lang kaayo mabalaka. Ang mga lakang nga ilang gihimo gisuportahan sa ilang Primo Ministro Boris Johnson.

Ang ubang kanasuran sama sa Estados Unidos ug ubang bahin sa Uropa apil na ta dinhi sa Pilipinas mimando na og enhance community quarantine, pinaagi sa pagdili na nga makasulod ang ubang mga tawo nga gikan sa mga lugar nga apektado sa Covid 19. Wala nay biyahe sa mga eroplano, barko ug ubang matang sa transportasyon. Dinhi lang sa ato, wala nay gitugutan nga makasulod gikan sa ubang lugar.

Apan didto sa UK, wala sila mosagop og community quarantine o lockdown. Bukas gihapon ang ilang nasud kang si bisan kinsa nga makasulod sa ilang teritoryo. Padayon gihapon ang ilang kalihukan sama sa mga entertainment, sports ug ubang kalihukan. Bukas gihapon ang ilang mga tulunghaan. Ang ila lamang nga gikanselar mao ang ilang umaabot nga local elections.

Kay matod pa sa ilang mga medical experts dili solusyon ang pag-imponer og community quarantine sa mga tawo ug ingon man ang lockdown. Nakasulod na sa ilang nasud ang virus ug daghan na ang natakbuyan niini. Ang ila lamang himuon nga mohinay kini og dili mokuyanap og maayo hangtod nga mawala. Naa ra sa matag individual o tawo kon unsa ang angay niyang buhaton aron dili matakbuyan sa virus.

Morag ang buot nga ipasabot sa mga medical expert nga pasagdi nga mokuyanap ang virus hangtod nga ma-immune ang tanan. Back to basic lang ang himuon sa mga tawo. Mao ang pagpanghunaw ug panabon sa ilang mga kamot, magbutang og alcohol ug manabon sa ilong ug baba kon mangatsi. Ilabay ang tissue nga gitabon sa baba sa insaktong lugar. Mao ra.

Pastilan no? Walay epekto sa ekonomiya ang gihimo sa UK sa pag-alkontra aning Covid 19. Dinhi sa ato, pwerting daghanang nasakripisyo apil ang patigayon ug ekonomiya. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph