PATROL base sa Citizen Armed Forces Geographical Unit (CAFGUE) sa Barangay Candayao, Siyudad sa Guihulngan, Negros Oriental, gi-harass sa mga sakop sa New People’s Army (NPA) nga ubos sa Leonardo Panaligan Command.
Matod ni Army Captain Cenon Pancito lll, chief division sa Public Affairs Office 3rd Infantry Division sa Guihulngan, Negros Oriental nga mga pasado alas 9 sa gabii niadtong Huwebes Marso 19, sulod sa duha ka minutos ang pagpaarak sa mga NPA tumong sa kampo sa Cafgu.
Gibana-bana ni Captain Pancito nga mga 200 metros ang gilay-on sa mga NPA gikan sa kampo.
Human nila gihimo ang pagpang harass, daling namiya ang mga rebeldeng komunista.
Wa mosuway pagbawos ang mga sundawo nga naa sa dapit tungod kay ngitngit na ang palibot ug di nila maklaro ang nahimutangan sa mga rebelde.
Ang gihimo sa mga sundawo ug mga sakop sa Cafgu mi cover lang una sa ilang nahimutangan aron way maangol o makalas sa ilang habig.
“The patrol base has put on defensive position immediately because the usual is that there is supposed to be an overrunning of a patrol base kung ganun,” matod ni Pancito lll.
Gikondinar nila ang gihimo sa walhong mga grupo gumikan sa pagdeklarar sa gobyerno nga unilateral ceasefire nunot sa miigo nga kalamidad karon sa tibuok kalibotan nga mao ang coronavirus disease (COVID-19).
Si Police Brigadier General Albert Ignatius Ferro, director sa kapulisan sa Central Visayas, nimando sa mga pulis sa Guihulngan nga mag-alerto.
Ang kapulisan sa dapit pabilin nga di molusad og opensiba batok sa mga sakop sa Communist Party of Philippines (CPP) National Democratic Front (NDF) ug NPA nunot sa ceasefire nga gipatuman, apan naka defensive position sila karon.
Pang hinaot ni Ferro ngadto sa NPA nga motahod sa gobyerno nga mao ang paghunong una sa gubat.
“Atung giampo nga ang CPP-NPA-NDF will reciprocate the governmen’ts gesture in good faith in the interest of public welfare in peace here in Central Visayas while we are experiencing a crises,” matod ni Ferro. (AYB)