MOKABAT sa P10 milyunes nga balor sa illegal drugs ang nasakmit sa lima ka mga durugista niadtong Biyernes sa alas 6:30 sa gabii sa Purok 1, Brgy. Nangka, lungsod sa Consolacion.
Nakaipsot ang giigong supplier nga si Cela Dela Cruz, 27, dalaga, high value individual (HVI), nagpuyo sa maong lugar.
Apan nasikop ang iyang kakunsabo nga si Ronel Ginganto, 27, laing HVI, target sa buy-bust.
Lakip sa nangadakpan sila si Francesco Garofalo, 27, newly identified (NI) personality, taga Brgy. Taboc, Mandaue City;
Rico Dela Cruz Uy, 19, taga Looc, Mandaue City; Ronie Conol, 29, HVI, taga Brgy. Poblacion Oriental, Consolacion, ug Josephine Uy, 21, taga Looc, Mandaue City.
Si Major Verniño Noserale, hepe sa Consolacion Police station nga nahinabi sa Superbalita Cebu, nibutyag nga si Ginganto ug Cela Dela Cruz, ang ilang target.
Nipalit silag usa ka dakong bulto kang Ginganto nga mobalor og P140,000 gamit ang boodle money.
Napusasan nila si Ginganto, nakuhaan pa og laing 10 ka ka dagkong putos.
Atol sa operasyon, didto sab ang mga hinanib nga tigrepake sa drugas ug manuyopay nga sila si Garofalo, Rico Uy, Rknie Conol ug Josephine Uy, kinsa nakuhaan sab og mga dagkong putos sa ilang possession.
Nakuha sab sa kapulisan ang P3,000 nga halin sa drugas.
Matod pa ni Noserale nga ang drugas motimbang og 1.5 kilos nga dunay Dangerous Drugs Board (DDB) value nga P9,750,000.
Sumala pa ni Noserale nga ang tinubdan ni Ginganto mao si Cela Dela Cruz, kinsang igsuon nga si Ronel naa sa Cebu City Jail.
Makabaligya silag drugas nga duha ka kilo matag semana sa Metro Cebu.
Mandaue
Bisan sa hulga sa coronavirus disease (COVID-19) padayon gihapon ang pagpamaligya sa usa ka lalake og illegal drugs.
Ang suspek nakuhaan og P1.3 milyones sa gituohang shabu atol sa buy-bust sa Opao Police Station sa Sitio Superior, Barangay Looc, Mandaue City alas 9:35 sa gabii sa Huwebes, Marso 19, 2020.
Giila ang suspek nga si Junie Lopez Bongo, 25, usa ka high value individual (HVI), taga Barangay Subangdaku sa mao nga siyudad.
Gipangulohan ni Police Maj. Aldrin Villacampa, hepe sa Opao Police Station, sa buy-bust.
Sigon ni Villacampa nga anaa na si Bongo sa ilang watchlist sukad 2017 ug kada pahigayon nila og operation, permi kining makaikyas.
“Idlas kaayo ni siya unya karon ra ni namo nadakpan,” sigon ni Villacampa.
Dugay na ni nilang gipangita si Bongo, apan makaikyas tungod kay magbalhinbalhin siya og puy-an ug karon lang natiyempohan.
Way laing panginabuhi si Bongo kon di ang pagpamilgya lang sa gidiling drugas.
Makabaligya ang suspek og 100 ngadto sa 150 ka gramos matag semana.
Adunay mga transaksyon sa dakbayan sa Mandaue ug Cebu.
Sa pagpangutana ni Villacampa kang Bongo kon asa kini gikan sa iyang drugas, miingon kini nga aduna siya’y contact sa Mandaue City Jail.
Dugang ni Villacampa nga mukontak lang siya sa iyang supplier nga anaa sa Mandaue City Jail ug anaa ray mutagbo niya sa Cebu CIty aron makuha ang iyang supply.
Nakigkoordinar na si Villacampa sa Mandaue City Jail aron masuta kon ang supplier niini anaa sa sulod sa prisohan.
Nakuha gikan ni Bongo ang 200 gramos sa gituohang shabu nga nagbalor og P1,360,000.
Kasamtangang anaa sa kustodiya sa Opao Police Station si Bongo ug pasakaan og kaso sunod semana sa kalapasan sa Republic Act. 9165 Sec. 5 ug Sec 12.