GILUSAD sa National Basketball Association (NBA) kagahapon ang NBA Together, usa ka global community ug social engagement campaign kansang katuoyan mao ang pagsuporta, pagpakigsulti, pag-edukar ug pagdasig sa mga kabatan-unan, mga pamilya ug mga sumosunod kabahin sa pagbatok sa coronavirus (Covid-19) pandemic.
Basi sa press release nga gipadangat sa NBA, ang programa nakatutok sa upat ka mga katuyoan. Kini mao ang Know the Facts, Acts of Caring, Expand Your Community ug NBA Together Live.
Tinguha sa NBA nga mas palapdan pa ang pagsabwag sa mga impormasyon kabahin sa pagbatok sa Covid-19 ug mopaambit og katakos alang sa pagsagubang ning maong krisis.
Ang “Know the Facts” mobutyag kon diin nagagikan ang Covid-19 ug uban pang mga impormasyon kabahin niini. Ipahibalo sab kon unsa ang labing maayong buhaton aron mapugngan ang pagkuyanap ning makalilisang nga virus.
Ang “Acts of Caring” magtutok sa mga magduduwa sa NBA players, mga sumosunod ug general public nga adunay katakos nga makahatag og suporta sa bisan unsa man nga pamaagi.
Mahimong mag-post og mga hulagway o videos nga adunay hashtag #NBATogether sa Twitter, Instagram, Facebook, ug TikTok nga makatabang sa pagsumpo sa Covid-19.
Ang “Expand Your Community” naglakip sa paglusad sa “Jr. NBA at Home,” usa ka bag-ong interactive content series alang sa mga dili makaduwa kauban ang ilang mga higala ug teammates apan gusto mahimong aktibo ning panahon nga nakasuspenso ang mga duwa sa NBA.
Ang “NBA Together Live” usa ka tipik ning maong programa diin ikasulti sa mga sakop sa NBA ang mga sumosunod sa liga sa tibuok kalibutan pinaagi sa social media.
Si Kevin Love sa Cleveland Cavaliers maoy labing unang magduduwa sa NBA nga makigsulti sa NBA fans ning maong tipik sa programa.
Nanghinaot ang NBA nga ning maong mga inisyatiba, hayan makatabang ang ilang sa pagsumpo ning maong krisis sa tibuok kalibutan.
Kauban ang WNBA, ang NBA nagtinguha nga makakuha og $50 million nga pundo aron ihatag nga hinabang ngadto sa mga hinmgtungdan.
Ang NBA ug WNBA nakigtambayayong sa Centers for Disease Control and Prevention (CDC), World Health Organization (WHO), ug kanhi U.S. Surgeon General Vivek Murthy lakip na sa federal hea lth experts alang ning maong programa.
Alang sa NBA, kining ilang lakang mga gihimo sa pagpakigbatok sa Covid-19 mas mahinungdanon pa kumpara sa pagduwa og basketball. (AP, ESL)