SUGOD Marso 19, 2020 gipatuman ang “Region-wide curfew” dungan sa pagpatuman sa lockdown sa tibuok Davao Region.
Ang Davao Region Covid-19 Task Force naka-desisyon nga ipatuman gayod pag-ayo ang curfew gikan alas 9 sa gabii hangtud alas 5 sa buntag. Naglibot-suroy ang awtoridad, gikan sa mando sa kapulisan paubos ngadto sa pagpatuman sa mga opisyal sa barangay.
Mismong ang barangay karon ang magtuyok-tuyok sa iyang ginsakpan aron ipahibalo ang curfew sa maong mga oras, likayan ang paggawas niini nga mga takna aron malikayan ang pagkuyanap sa coronavirus disease (Covid-19) diha sa komunidad.
Sa naandan nga curfew nga ang menor de edad pang-rescue-hon ug dalhon sa buhatan sa kapulisan, karon dili kini mahitabo kay diha palang daan sa mga barangay walay hunong ang pagtuyok-tuyok sa mga opisyal sa barangay aron pahimangnoan ang mga residente.
Sumala sa Chairperson sa Regional Peace and Order Council ug sa Regional Development Council nga si Davao City Mayor Sara Duterte-Carpio nga kinahanglan motuman ang tanan niini gumikan usa kini sa mga pamaagi nga dili kakuyanap ang virus sa komunidad kay wala ma’y mga tawo sa gawas.
Makaayo sab ang curfew kay sayo naman mangatulog ang tawo, nga usa sa mga makapalig-on sa immune system, kay dili na magpulaw. Kung lig-on ang lawas, lisod kaayo taptan og sakit.
Busa di mabalaka sa curfew, kaayohan kini natong tanan luyo niining nagkataas nga kaso sa nataptan sa Covid-19 sa tibuok kalibutan.