SUGOD alas 3 sa hapon, Dominggo, Marso 22, gidid-an na sa lokal nga kagamhanan sa dakbayan sa Lapu-Lapu nga mugawas sa panimalay ang mga menor de edad, tinun-an, ug katiguwangan nga nagpangedaron og 65 anyos pataas.
Gipahibawo kini ni Mayor Junard "Ahong" Chan atol sa iyang public announcement nga gipaagi og Facebook live kaganihang kadlawon, Dominggo.
Giklaro ni Chan nga dili applicable ang maong mando panahon sa emerhensiya, exempted sab ang mga magpa-check-up ug magpatambal lakip na ang mga mo-escort sa mga masakiton. Wala sab labot ang mga trabahante o mga working student basta magdala lang og company ID o certificate of employment.
Matod ni Chan nga usa kini sa mga lakang sa dakbayan alang sa paglikay sa pagkatap sa coronavirus disease (Covid-19).
Limitado ang kalihukan
Laing executive order usab ang giluwatan ni Chan nga "mo-limit sa mga kalihukan nga mo-resulta sa panagtapok sa katawhan sa pampublikong lugar."
Sugod alas 12:01 sa kadlawon, Marso 23, temporaryong pasirhan sa dakbayan ang mga Internet cafe, barbershop, beauty parlor o salon, spa o massage parlor, fitness o sports gym, casino o pasugalan, mall, department store, shopping center, karaoke bar, ug night club o uban pang mga establisyemento nga adunay ilimnong makahubog.
Lakip sab nga pasirad-an ang mga dental clinic subay sa kamandoan sa Philippine Dental Association.
Gitataw ni Chan nga ma-revoke ang business permit sa mga establisyemento nga mosupak sa maong kamandoan.
"Kinahanglan nako ang pagsabot sa striktong pagpatuman niining atong mando kay dili kita maka-afford nga mabutang sa peligro ang panglawas sa katawhan," asoy ni Chan.
Giawhag usab sa mayor ang mga apektadong establisyemento sa paghatag og 13-month pay ngadto sa mga empleyado niini.
"Subay niini atong gihangyo ang maong mga establisyemento sa paghatag sa ilang 13-month pay para sa ilang pang adlaw-adlaw nga pangkonsumo samtang wala pa silay trabaho," asoy ni Chan.
Walay labot
Walay labot sa mando sa mayor ang mga grocery store, supermarket, pharmacy, hardware, banko, kan-anan, medical clinic o laboratoryo, money remittance o foreign currency exchange center, ug ang mga government agency nga nag-operate sulod sa mall.
Gihangyo ni Chan ang publiko nga magpabilin sulod sa panimalay ug mogawas lang kon adunay importante nga paliton o katuyoan.
"Kinahanglan nako ang inyong dakong kooperasyon ug pagsabot para malampuson natong mabuntog ang hulga sa coronavirus. Lets aim for a Covid-free Lapu-Lapu City," asoy ni Chan. (NDT)